26 milljónir króna í ráðgjafarþjónustu á hálfs árs tímabili

Forsætisráðuneytið hefur keypt ráðgjafarþjónustu fyrir 26.203.244 kr. af lögaðilum og sjálfstæðum verktökum á tímabilinu 1.júlí 2013 til 15.mars 2014, rúmlega hálfs árs tímabili. Þetta kom fram í svari Sigmundar Davíðs Gunnlaugssonar, forsætisráðherra, við fyrirspurn Svandísar Svavarsdóttur, þingmanns vinstri hreyfingarinnar – græns framboðs á vef Alþingis í dag.

Í svari forsætisráðherra segir að með ráðgjafarþjónustu sé átt við vinnu lögfræðinga, viðskipta-og hagfræðinga, löggiltra endurskoðenda, rekstrarráðgjafa, landfræðinga, fyrirtækja á sviði auglýsingaþjónustu, upplýsingaöflunar, kynningarstarfsemi og ýmis önnur ráðgjafarstörf.

Þá segir að inni í heildarfjölda ráðgjafa séu einnig þeir aðilar sem setið hafa í eða unnið fyrir tímabundnar verkefnanefndir á vegum ráðuneytisins og þegið laun fyrir sem og aðkeypt ráðgjafarþjónusta vegna vinnu stjórnvalda við undirbúning og framkvæmd áætlunar um losun fjármagnshafta og jafnframt ráðgjafarþjónusta fyrir fastanefndir ráðuneytisins og sjálfstæðar úrskurðanefndir sem heyra undir ráðuneytið.