„Burtu með fordóma“ hvatningarorð ÖBÍ í 1. maí göngu

Í 1. maí göngunni í ár hefur Öryrkjabandalag Íslands (ÖBÍ) ákveðið að setja baráttuna um fordómalaust samfélag – betra samfélag fyrir alla á oddinn. ÖBÍ nýtir sér jákvæða tóna sem eru í Eurovisionlagi Pollapönkaranna þar sem í textanum segir; „Burt með fordóma“.

Fram kemur í yfirlýsingu frá OBÍ að fordómalaust samfélag sé samfélag mannréttinda og velferðar þar sem fólk nýtur skilnings og stuðnings á alla vegu.

Gönguhópurinn verður litríkur þetta árið því göngufólkinu verður gefið „buff“ með áletrun og marglitum táknmyndum.

Myndirnar vísa til fjölbreytileika samfélagsins og minna á að fólk er allskonar, þar á meðal fatlað fólk. Áletrunin á buffinu segir „Burt með fordóma“ og „Betra samfélag“.

Safnast verður saman á bílaplani við Arionbanka við Hlemm klukkan 13.00, þar verður einnig hafin útdeiling á „buffum“.

Gangan hefst kl.13.30 og fer niður Laugaveginn að Ingólfstorgi, þar sem formleg dagskrá hefst kl. 14.10.

Þeir sem vilja stytta sér leið geta hist við klukkuna á Lækjartorgi um kl.13.45 og slegist í hópinn þegar hann nálgast.