Kjaradeila eftir metár hjá Mary Poppins

Hljóðfæraleikarar sem tóku þátt í uppfærslu Borgarleikhússins á Mary Poppins standa nú í málaferlum við leikhúsið vegna túlkunar á kjarasamningum Leikfélags Reykjavíkur og Félags íslenskra hljómlistarmanna, FÍH.

Mary Poppins var umfangsmesta uppfærsla sem ráðist hefur verið í á Íslandi og sýnd samtals 135 sinnum. Ellefu hljóðfæraleikarar komu að hverri sýningu, þar af einn hljómsveitarstjóri.

Kjarasamningur FÍH og Leikfélags Reykjavíkur kveður á um sérstakar greiðslur fyrir fullgilda hljóðfæraleikara annars vegar og leiðandi menn hins vegar. Ágreiningur Leikfélags Reykjavíkur og FÍH snýst um hvort hljóðfæraleikari teljist leiðandi maður ef hann spilar einn á hljóðfæri án þess að leiða hóp manna.

Þorsteinn S. Ásmundsson, framkvæmdastjóri Borgarleikhússins, segir að FÍH og leikhúsið hafi verið sammála um að fá niðurstöðu í málið fyrir dómstólum því ágreiningurinn komi öðru hvoru upp við uppfærslur leikhússins.

„Þeir fara fram á að hlutirnir séu túlkaðir eins og þeir leggja til. Það kemur fram í útreikningum hvernig við lítum á samninginn. Þetta er svona eftir á túlkun hjá FÍH en þetta er ekkert stórmál. Við höfum litið svo á að leiðandi maður leiði einhvern hóp, okkur finnst það liggja í orðanna hljóðan. Okkur finnst skrýtið ef leiðandi maður leiðir bara sjálfan sig.“

FÍH miðar við þá skilgreiningu að allir hljómsveitarmeðlimir séu skilgreindir sem leiðandi menn ef hljómsveitin er skipuð færri en tólf meðlimum.

Björn Árnason, formaður FÍH segir að hefð sé fyrir skilgreiningunni „Þessi skipting er alþjóðleg og ekki einhver lygi í kjarasamningum. Við höfum haft hana í okkar samningum frá 1984.“

Kjör hljóðfæraleikara við Þjóðleikhúsið miðast við skilgreiningu FÍH.

Tvær og hálf milljón standa út af borðinu

Kröfur hljóðfæraleikaranna eru að allir, nema hljómsveitarstjóri, séu skilgreindir sem leiðandi menn. Ef hljóðfæraleikararnir hefðu verið skilgreindir sem leiðandi menn hefðu þeir haft nær 230 þúsund krónum hærri tekjur á tímabilinu. Sé miðað við þann æfingafjölda sem liggur fyrir hefðu þeir haft um 35 þúsund krónum hærri tekjur á æfingatímabilinu. Samanlagðar tekjur tónlistarmannanna tíu eru því rúmar 2,5 milljónir króna.