Níu rauðar rósir

Á fullveldisdaginn voru 15 bækur tilnefndar til Íslensku bókmenntaverðlaunanna við hátíðlega athöfn á Kjarvalsstöðum og óska ég höfundum þeirra til hamingju. Forlagið gefur út 60% bókanna eða níu talsins en framkvæmdastjóri þess er einnig formaður Félags íslenskra bókaútgefenda (FÍBÚT) sem veitir verðlaunin. Hann stýrði athöfninni og afhenti sérhverjum höfundi blóm; það fannst mér undarleg stund, sami maðurinn sat beggja vegna borðsins, var bæði veitandi og þiggjandi og í raun að færa sjálfum sér viðurkenningar og níu rauðar rósir.

Þegar betur er að gáð kemur í ljós að formaður FÍBÚT er ekki eini stjórnarmaðurinn sem er tengdur Forlaginu. Varaformaðurinn er fyrrverandi starfsmaður þess, gjaldkerinn er ritstjóri þar á bæ og einn meðstjórnenda er í útgáfusamstarfi við fyrirtækið.

Stjórn FÍBÚT er ein af birtingarmyndum þess landslags sem blasir við á íslenskum bókamarkaði þar sem eitt fyrirtæki hefur náð markaðsráðandi stöðu. Margir fjölmiðlamenn, rithöfundar, bókaútgefendur og bókakaupmenn þekkja þessa mynd en fæstir þeirra kjósa að tjá sig um hana.