Harmonikkan hertekur Nýdanska

„Þetta gekk virkilega vel en við vissum í raun ekkert hvað við vorum að fara út í upphafi,“ segir Andri Snær Þorsteinsson, en hann og bróðir hans, Bragi Fannar skipa dúettinn Harmonikkubræður og luku þeir nýverið við upptökur á plötu sem inniheldur lög hljómsveitarinnar Nýdönsk.

Um er að ræða plötu þar sem lög Nýdanskrar hafa verið sett í nýjan og hressan harmonikkubúning. „Það er allavega eitt þekkt lag sem er komið í valstakt og svo eru önnur í tangó,“ bætir Andri við léttur í lundu.

„Ég er geysilega mikill harmonikkuunnandi og hefur alltaf dreymt um að heyra lögin okkar flutt á harmonikku. Við kunnum ekkert á nikkur þannig að við fengum aðra í þetta,“ segir Björn Jörundur Friðbjörnsson, bassaleikari og söngvari Nýdanskrar, sem er spenntur fyrir nýju plötunni.

Platan ber heitið 12 íslensk Nýdönsklög en samstarf bræðranna og Nýdanskrar má rekja til tónleika þeirra síðarnefndu í Hörpu á síðasta ári. „Við hituðum upp fyrir þá í Hörpu og eftir það vildu þeir endilega gefa út með okkur disk,“ segir Andri Snær.

Ólafur Hólm Einarsson, trommuleikari Nýdanskrar, sá um æfingar fyrir plötuna og stjórnaði einnig upptökum ásamt Gunnari Árnasyni. „Þetta er í fyrsta sinn sem ég er við stjórnvölinn, það var mjög sérstakt að vera að segja mönnum til og þar á meðal trommuleikara. Það var pínu skrítið að koma mínum hugmyndum til annars trommara. Það var gaman að setja þetta í allt öðrvísi búning og þetta skotgekk,“ segir Ólafur Hólm um ferlið.

Hugmyndin að plötunni varð til þegar Nýdanskir voru staddir í Berlín fyrir skömmu að hljóðrita plötu. „Þegar við eyðum svona löngum tíma saman þá verða til alls kyns skemmtilegar hugmyndir,“ bætir Björn Jörundur við.

Gert er ráð fyrir að platan komi út um miðjan júní. „Plötunni verður líklega fagnað með harmonikkudansleik, þar sem við verðum hressir á dansgólfinu,“ segir Björn Jörundur.

Hér er hægt að fylgjast enn frekar með Harmonikkubræðrum.