Póstkassi jólasveinanna skyggir á verslanir

„Það vildi enginn hafa þetta,“ segir Helgi Snæbjarnarson, formaður skipulagsnefndar Akureyrar, um þá ákvörðun nefndarinnar að synja um leyfi fyrir áframhaldandi veru póstkassa jólasveinanna í göngugötu bæjarins.

Póstkassi jólasveinanna hefur verið í göngugötunni í eitt ár. Í hann geta menn sett kort sem þeir kaupa og fylla út með kveðjum og óskum til íslensku jólasveinanna.

Eins og fram kom í Frétablaðinu gær telur Guðmundur R. Lúðvíkssonm, sem rekur póstkassann, að rök skipulagsnefndar um slæmt ástand kassans ekki standast.

Helgi segir það ekki hafa verið auðvelt að finna póstkassanum stað sem á endanum var settur niður við staur á miðri göngugötunni.

„Það eru búðargluggar alls staðar og menn vilja ekki hafa þetta við þá því þetta er stórt og mikið og skyggir á,“ útskýrir Helgi.

„Þetta bara fer illa finnst okkur á þessum stað og það er næg ástæða til að hafna þessu. Það þarf bara að velja þessu einhvern annan stað eða finna þessu einhvern annan farveg ef menn vilja halda þessu áfram. Það er hægt að sækja um aftur og við finnum þá annan stað.“