Þráðlaust net og hundrað ný tæki

Þráðlaust net verður komið í alla leikskólana nítján í Kópavogi í sumarlok. Þetta segir Sigríður B. Tómasdóttir, almannatengill Kópavogsbæjar. Fjóla Þorvaldsdóttir, varaformaður Félags leikskólakennara og sérkennslustjóri í leikskóla í Kópavogi, hefur lýst því yfir að ekki sé hægt að nota efni Námsgagnastofnunar með íslensku efni fyrir spjaldtölvur vegna skorts á þráðlausu neti í leikskólunum þar.

Sigríður segir að fyrsta áfanga í uppsetningu þráðlauss nets verði lokið í sumar. „Það verður komið þráðlaust net í alla leikskólana í lok sumars en einhver svæði inni á leikskólunum eða deildir verða án þráðlauss nets. Á næsta ári verður svo lokið við að setja upp þráðlaust net alls staðar í leikskólana.“

Allar deildir í leikskólunum nítján fá einnig í sumar ný tæki að eigin vali, spjaldtölvu, fartölvu eða borðtölvu. „Leikskólunum hefur þegar verið sent bréf um að þessi tæki standi til boða. Þetta eru um 100 tæki sem Kópavogsbær kaupir handa leikskólunum. Þess má geta að mjög margir hafa ákveðið að velja spjaldtölvur inn á deildirnar hjá sér og bærinn hefur staðið fyrir námskeiðum í notkun spjaldtölvu í kennslu í leikskólum og mun halda fleiri námskeið í haust.“