Fjárlaganefnd tekur LbhÍ til umfjöllunar

Fulltrúar menntamálaráðuneytisins og Landbúnaðarháskólans á Hvanneyri (LbhÍ) mæta til fundar við fjárlaganefnd Alþingis öðrum hvorum megin við næstu mánaðamót, að sögn Haraldar Benediktssonar, þingmanns Sjálfstæðisflokks í Norðvesturkjördæmi.

Haraldur, sem sæti á í nefndinni, vonast til að þá fáist skýrari mynd af stöðu skólans.

Haraldur segist frá upphafi hafa talað fyrir því að skoðaðar yrðu fleiri leiðir en sameining LbhÍ við Háskóla Íslands.

„Þar voru boðnir fram mjög miklir peningar í uppbyggingu og í aukin framlög og þá vakna spurningar um hvaða greiningar lágu þar að baki, hvaða forgangsröðun var á þessum verkefnum og hvers vegna peningarnir hverfa ef hugmyndir ráðherrans ná ekki fram að ganga og þá snúið í þveröfuga átt og talað um niðurskurð,“ segir Haraldur og kveður sína skoðun að „mjög illa“ hafi verið haldið á málinu, og það þótt í hlut eigi flokksbróðir hans, Illugi Gunnarsson menntamálaráðherra.

Afstaða þeirra þingmanna kjördæmisins sem látið hafa sig málefni LbhÍ varða sé hins vegar enn skýr og í þá átt að verja skólann í kjördæminu. Snýst um það, á mannamáli. „Ég hef ekki heyrt á norðvesturþingmönnum nein mismunandi sjónarmið í þessum efnum.“

Umræðan um sameiningu við Háskóla Íslands gjaldi fyrir það að stjórnvöld hafi áður komið fram með fyrirætlanir á fjárframlögum um uppbyggingu á landsbyggðinni. 

„Og svo sitja landsbyggðarmenn ævinlega uppi með svartapétur þegar þarf að fara skera niður.“ Ljóst er að mati Haraldar að áætlanir um sameiningu við HÍ hafi ekki miðað að aukinni hagræðingu því henni hefði fylgt stóraukinn kostnaður,svo sem í hærri launum til prófessora og kennaraliðs við LbhÍ. 

Fjárhagsáætlun sem LbhÍ skilaði til menntamálaráðuneytisins um síðustu mánaðamót og gerir ráð fyrir fækkun um 15 stöðugildi hefur enn ekki fengið uppáskrift í ráðuneytinu. 

Þrátt fyrir ítrekaða eftirgrennslan hafa ekki borist svör frá menntamálaráðuneytinu um stöðu málsins.