Endurheimtir gamla nafnið

Safnahúsið við Hverfisgötu, áður Þjóðmenningarhúsið, sem var vígt 28. apríl 1909 hefur nú fengið gamla nafn sitt aftur.

Um þessar mundir er unnið að grunnsýningu um íslenska listasögu og sjónrænan menningararf sem fyrirhugað er að opnuð verði í Safnahúsinu haustið 2014. Í tilkynningu segir að það sé í anda samstarfs nokkurra stofnana sem að sýningunni standa að nafnbreytingin eigi sér stað nú.

Stofnanirnar eru Þjóðminjasafn Íslands, sem sér um rekstur hússins, Listasafn Íslands, Náttúruminjasafn Íslands, Þjóðskjalasafn Íslands, Landsbókasafn Íslands - Háskólabókasafn og Stofnun Árna Magnússonar í íslenskum fræðum.