Íbúar á aðstoð að sprengja áætlun ársins í Reykjanesbæ

„Eðli þessara útgjalda er líkt og þjónusta á bráðadeild sjúkrahúsa, við höfum lítið val. Fólk í neyð á rétt á slíkri aðstoð lögum samkvæmt,“ segir Hjördís Árnadóttir, framkvæmdastjóri fjölskyldu- og félagssviðs Reykjanesbæjar, þar sem nær fjögur prósent íbúa framfleyta sér með fjárhagsaðstoð úr sveitarsjóði.

Á árinu 2013 nutu alls 557 einstaklingar fjárhagsaðstoðar í 14.500 manna samfélagi Reykjanesbæjar. Það svarar til 3,8 prósenta af íbúunum. Útgjöld bæjarins vegna þessa voru 275 milljónir eða um 104 milljónir umfram áætlun. Hjördís segir þetta einn stærsta óvissuþáttinn í rekstri bæjarfélagsins.

Fjölgun þeirra sem fá aðstoð hefur verið mest hjá fólki á aldrinum 18-29 ára. Frá 2007 hefur þeim fjölgað um 250 prósent á fjárhagsaðstoð. Þess utan er fólk lengur á bótum en áður.

„Margir í þessum aldurshópi eiga ekki aðra framfærslumöguleika, hafa aldrei unnið sér inn atvinnuleysisbótarétt og eiga ekki auðsótt á vinnumarkaðinn,“ segir Hjördís.

Á síðasta ári misstu 146 manns úr Reykjanesbæ bótarétt sinn hjá Vinnumálastofnun og er áætlað að 158 fullnýti hann á þessu ári. Nærri helmingur þeirra 200 milljóna sem áætlaðar voru í fjárhagsaðstoð á þessu ári kláraðist á fyrstu þremur mánuðum ársins.

Hjördís segir ekki minna áhyggjuefni hvað verði um þann hóp sem er hvorki talinn með atvinnulausum né bótaþegum bæjarins. Fjölskyldufólk þurfi að treysta á framfærslu frá einum í stað tveggja. Margir séu í miklum vanda og eftirspurn eftir félagslegu leiguhúsnæði hafi aldrei verið meiri. 

„Fólk gistir hjá ættingjum og vinum svo vikum og mánuðum skiptir,“ segir Hjördís Árnadóttir.