Hugleikur og Ari skemmta í Finnlandi

Hugleikur Dagsson heldur á þriðjudaginn ásamt frænda sínum, Ara Eldjárni, í uppistandsferðalag um Finnland. „Þeir kalla túrinn okkar Icelandic Comedy Invasion,“ segir Hugleikur, en þeir Ari skemmta í bæjunum Turku, Tampere, Oulu, Jyväskylä, og loks í Helsinki. „Þetta kom til eftir að Ari og félagar hans í Mið-Íslandi fengu André Wickström, sem er finnskur uppistandari, sem gestauppistandara á sýningu hjá Mið-Íslandi.“

„Ég dró Ara og André í eftirpartí eftir uppistand. Síðan þá höfum við verið Facebook-vinir. Ég spurði hann hvort það væri ekki möguleiki á því að ég gæti verið með uppistand í Finnlandi. Hann stakk upp á að við Ari kæmum saman, en Ari hafði farið áður til Finnlands með uppistand. Það endaði með því að okkur var skellt á grínhátíð í Turku síðastliðið haust. Á þessari grínhátíð vöktum við svo mikla lukku að við vorum beðnir um að koma aftur. Þess vegna erum við að fara í þennan túr núna. Svo förum við enn og aftur á einhverja grínhátíð í Finnlandi í sumar í bæ sem heitir Kuopio,“ segir Hugleikur.

Bækur Hugleiks hafa notið mikilla vinsælda í Finnlandi. „Ég er einmitt að svara hér viðtali á netinu við finnskan vefmiðil sem spyr meðal annars hvort Íslendingar og Finnar séu sálufélagar,“ segir Hugleikur.