Mikill óhemjugangur á Alþingi

Salóme Þorkelsdóttir, sem starfaði sem forseti Alþingis á árunum 1991 til 1995, fylgist grannt með Alþingi í sjónvarpinu á degi hverjum. Henni blöskrar orðfar þingmanna undanfarna daga.

„Mér finnst þetta sorglegt og dapurlegt. Ég á ekki nógu sterk orð til að lýsa þessu,“ segir Salóme, aðspurð. „Þó að oft hafi verið tekist á man ég ekki eftir því eins og það hefur verið undanfarna daga. Þetta er svo mikill óhemjugangur. Sumir þingmenn hafa ekki stjórn á skapi sínu og sleppa ýmsu frá sér sem þeir myndu ekki gera annars. Það skiptir máli að vera málefnalegur og menn verða að virða skoðanir hvers annars.“

Á meðal þess sem hefur verið sagt í hita leiksins er „helvítis dóni“, „hroðbjóður“ og „þvílíkur ómerkingur“. Spurð hvort orðfarinu hafi hrakað síðan hún sat í forsetastólnum segir Salóme að það hafi því miður breyst til hins verra, sem sé leitt því Alþingi sé virðingarmesta stofnun þjóðarinnar. Það særir hana einnig að hlusta á umræðuna um fundarstjórn forseta. „Mér finnst núverandi forseti standa sig með miklum ágætum.“

Salóme, sem verður 87 ára í sumar, segist sakna gamla, góða vinnustaðarins. „Þótt margir haldi það ekki þá eru þingmenn góðir vinir þegar þeir eru ekki í ræðustól að karpa, jafnvel þvert á alla þingflokka. Það er gott fólk í öllum flokkum en menn þurfa svolítið að gæta sín.“