Verðum að skoða veru okkar innan Kennarasambandsins

„Við þurfum að skoða vandlega veru okkar innan Kennarasambandsins,“ segir Guðríður Arnardóttir nýkjörinn formaður Félags framhaldsskólakennara.

Hún segist ekki hafa lúrt á þeirri skoðun sinni að framhaldsskólakennarar eigi helst samleið með félögum sínum í Bandalagi háskólamanna.

„Framhaldsskólakennarar eru sérfræðingar sem miðla þekkingu sinni áfram,“ segir Guðríður.

Nýlega fór fram viðhorfskönnun meðal Framhaldsskólakennara en ekki er búið að birta niðurstöður hennar opinberlega.

Guðríður segir að það sem hafi komið henni mest á óvart þegar hún skoðaði niðurstöður könnunarinnar var hversu lítil þekking er á starfsemi Kennarasambandsins. Þá komi fram í könnuninni að þeir sem svara séu ekki ánægðir með þjónustu

Kennarasambandsins. Guðríður segir að það verði að fara vel yfir þessar niðurstöður og taka mið af þeim.

Annað sem kom fram í könnuninni var að hluti framhaldsskólakennara vill ganga í BHM.

Aðrir vildu ekki segja skilið við Kennarasambandið heldur lýstu þeirri skoðun sinni að sambandið ætti að hætta að starfa sem stéttarfélag en verða þess í stað regnhlífasamtök fyrir öll stéttarfélög kennara.

Ekki var mikil þátttaka í viðhorfskönnuninni eða innan við 50 prósent.

Guðríður segir að það breyti því ekki að það verði að taka mið af könnuninni.

„Þeir taka þátt sem láta sig málið varða,“ segir hún.

Hanna Björg Vilhjálmsdóttir formaður stöðunefndar Félags framhaldsskólakennara segir að það sé margar skoðanir í gangi.

„Eftir 14 ára veru í Kennarasambandinu er ekkert óeðlilegt við að menn líti um öxl og vegi og meti stöðu sína,“ segir Hanna Björg.

Hún segist ætla að kynna niðurstöður könnunarinnar á aðalfundi Félags framahaldsskólakennara í mars.