Settið í Kastljósi er sett saman af séríslensku hugviti

Iðnþing var haldið í gær og hvatti Svana Helen Björnsdóttir, fráfarandi formaður Samtaka iðnaðarins stjórnvöld til að taka ekki valkosti út af borðinu með því að kallað aðildarumsókn að Evrópusambandinu til baka. Ragnheiður Elín Árnadóttir iðnaðarráðherra var á þinginu, hún flutti einnig ræðu en vék að öðru: Hún hvatti Kastljósfólk Ríkissjónvarpsins til að hafa íslensk húsgögn í settinu hjá sér. Þau væru vissulega flott en hún vildi sjá íslenska framleiðslu og hönnun sem birtist landsmönnum á hverju kvöldi. Fréttablaðið greinir frá þessu í dag.

Vísir ræddi við þá Egil Eðvarðsson framleiðanda og Úlf Grønvold Karlsson leikmyndahönnuð hjá hönnunardeild sjónvarpsins og þeir bentu á að þeim þætti vissulega vænt um íslensk húsgögn og íslenska hönnun en þeir eru ekki bara með slíkt af því að það er íslenskt. Það verður að henta. „Við erum meðvitaðir um þetta og öllu þessu er haganlega blandað saman af séríslenskri smekkvísi hönnunardeildar Ríkisútvarpsins. Þeir íslensku hönnuðir sem hér eru umgangast erlent fólk þrátt fyrir að vera íslenskir,“ segir Egill sem ásamt Úlfi og Rebekku Austmann Ingimundardóttur komu helst að hönnuninni.

Úr búi ömmu leikmyndahönnuðarins

Settið í Kastljósinu er þrískipt; standborð, sófi, stólar og sófaborð og svo viðtalsborð og stólar. Þeir Úlfur og Egill segja þetta samtíning. Og við athugun kemur í ljós að þetta er að verulegu leyti íslensk hönnun. „Hér eru frábærir smiðir og hönnunardeildin smíðaði borðin, eða þarna er gamalt tekkborð úr leikmyndageymslu sjónvarpsins sem var pússað upp. Þarna eru gamlir stólar sem eru hannaðir af íslenskum hönnuði fyrir mörgum árum, og ekki bara úr props-safninu heldur úr búi ömmu leikmyndahönnuðarins (Úlfs) sem voru bólstraðir upp á nýtt. Við reynum að vera nýtin. Hér er sparnaður. Púðarnir eru sérhannaðir af Ingibjörgu saumakonu... Þetta er mikið til smíðað á leikmyndaverkstæði sjónvarpsins,“ segir Úlfur.

Stólarnir frá þeim Eames-hjónum

Og Egill bendir á að bakgrunnurinn, „það sem er mest áberandi og meira áberandi en húsgögnin, það er allt saman myndir sem við höfum tekið sjálfir. Mynduðum allskonar hluta af íslenskum arkítektúr. Allt vaðandi í honum. Harpa þarna í annarri hvorri mynd.“

Og þannig má áfram telja. Viðtalsborðið er sérsmíðað af leikmyndadeildinni. Þeir Úlfur og Egill telja að líkast til sé ráðherra að tala um stólana við viðtalsborðið. Þeir eru frá hinum heimsþekktu Eames-hjónum frá Bandaríkjunum. Úlfur bendir á að þegar svona þættir eru gerðir er oftast ákaflega stuttur tími sem gefst, ákvörðun er tekin hratt í þessum bransa, kvikmyndum og sjónvarpi. Þá þarf að finna húsgögn sem henta. Betri tími gafst með þátt Gísla Marteins og þar er leikmyndin meira og minna íslensk.