Ekki bara stelpur í ísbúðum og strákar að keyra út pizzur

Jafnréttisstofa hefur sent frá sér tilkynningu til atvinnurekenda sem hyggjast ráða skólafólk í vinnu til sín í sumar. Þeir eru minntir á að úthluta ekki störfum eftir fyrirframákveðnum kynhlutverkum. Eða eins og segir í tilkynningunni:

„Til dæmis þá má ekki bara ráða stelpur til að afgreiða í ísbúðum eða þrífa á hótelum bara af því að þær eru stelpur og það má ekki bara ráða stráka til að keyra út pizzur eða vinna við malbikun af því að þeir eru strákar.“

Kristín Ástgeirsdóttir er framkvæmdastýra Jafréttisstofu. Hún segist hafa tekið á móti talsverðum fjölda kvartana frá ungu fólki og foreldrum sem töldu að verkefnum í starfi hafi verið úthlutað eftir kyni.

„Það er eins og einhverjir trúi því að strákar geti ekki afgreitt í ísbúð og að stelpur geti ekki keyrt út pizzur. Það er eins og einhverjir haldi að strákar geti ekki verið snyrtilegir og séð um afgreiðslu,“ segir hún í samtali við Vísi. Kristín segir það alltof algengt að störfum sé úthlutað eftir kyni. „Það þarf einfaldlega að kenna fólki og leyfa því að aðlagast sínu hlutverki óháð kyni. Það er ótrúlega sterkt í fólki að hæfni fari eftir kyni, eins og við sáum í Sambíó-málinu.“

Hún segist ekki hafa gert formlega könnun á hversu mörg símtöl hafi borist Jafnréttisstofu. En séu orðin það mörg að tilefni sé til að minna á þetta vandamál.

„Markmið jafnréttislaganna er að allir einstaklingar hafi jöfn tækifæri til að njóta eigin atorku og þroska hæfileika sína óháð kyni. Við skulum tryggja að svo sé,“ eins og segir í tilkynningunni.

Post by Jafnréttisstofa.