Rannsókn Ríkissaksóknara á lögregluaðgerð í Hraunbæ er enn í gangi

Tæknideild lögreglunnar vinnur enn að rannsókn sinni á aðgerðum lögreglu í Hraunbæ í desember, þegar menn frá sérsveit Ríkislögreglustjóra skutu vopnaðan mann til bana í íbúð sinni.

Ríkissaksóknari rannsakar nú málið og segir Sigríður J. Friðjónsdóttir saksóknari að tímasetning á því hvenær rannsókninni ljúki liggi enn ekki fyrir.

Hún segir, að eftir að ríkissaksóknari fær rannsóknargögn tæknideildar í hendur, megi reikna með að rannsókn málsins teljist lokið. Það verði hins vegar metið eftir að ríkissaksóknari hefur farið vandlega yfir öll gögn málsins. Niðurstöður rannsóknarinnar verða gerðar opinberar, þegar þær liggja fyrir.