Stórlega orðum aukin frásögn

„Þetta er stórlega orðum aukið og það er ekki mikið til í þessu,“ sagði Páll Egill Winkel, forstjóri Fangelsismálastofnunar, í fréttum Bylgjunnar í morgun. „Ég má ekki tjá mig um einstök mál en get þó fullyrt að málavaxtalýsing sú sem kemur fram í fréttinni er ekki í samræmi við raunveruleikann,“ segir Páll Í svari við fyrirspurn Vísis vegna rannsóknar á líkamsárás fangavarða á Litla Hrauni gegn vistmanni þar.

Páll bætir við að starfsmönnum hafi ekki verið vikið úr starfi vegna þessa máls. „Við fáum ekki oft kvartanir frá föngum vegna ofbeldis af hálfu fangavarða en tökum vissulega slíkar kvartanir alvarlega.“

„Staðreyndin er að fangaverðir eru með valdbeitingarheimildir og þeir komast því miður ekki alltaf hjá því að beita þeim. Fangaverðir eiga stundum við menn sem eru undir áhrifum fíkniefna, eru ofbeldishneigðir fara ekki að reglum fangelsa og þá er þetta stundum neyðarbrauðið sem gripið er til,“ sagði Páll á Bylgjunni.

Hann sagði að fara ætti varlega með þessar heimildir og að það væri gert. „Við viljum manna helst að komi upp vafamál séu þau skoðuð. En kærur á hendur fangavörðum eru fáar, fremur sjaldgæfar, en að sjálfsögðu eiga allir sem telja á sér brotið rétt á að setja fram kæru.“