Fyrstu bandarísku hermennirnir komnir til Íraks

Fyrstu bandarísku hermennirnir sem eiga að liðsinna íraska hernum í baráttu sinni gegn ISIS-samtökunum eru lentir í landinu og hafa hafist handa er fram kemur í frétt BBC um málið.

Bandarísk stjórnvöld hafa lofað að senda 300 sérþjálfa hermenn til landsins með það að markmiði að vinna bug á vargöldinni sem ríkt hefur í Írak á síðustu vikum. Helmingur þeirra hefur verið fluttur á vígstöðvarnar og búist er við hinum helmingi hópsins á næstu dögum.

Mennirnir munu koma til með að aðstoða Íraka í baráttu sinni án þess þó að hleypa sjálfir af vopnum. Liðsstyrkur þeirra eigi aðallega að felast í ráðgjöf og upplýsingaöflun - þrátt fyrir að írösk stjórnvöld hafi farið fram á hernaðaríhlutun Bandaríkjamanna. Barack Obama, forseti Bandaríkjanna, hefur þó verið tregur fram til þessa að fallast á beiðni þeirra um loftárásir á mikilvægar bækistöðvar ISIS-samtakanna.

Talið er þó að Bandaríkjamenn setji ákveðin skilyrði fyrir slíkri aðstoð, meðal annars þau að ríkisstjórn landsins verði stokkuð upp en þeir eru sagðir orðnir þreyttir á stjórnarháttum forsætisráðherrans Nouri al Maliki, sem er sakaður um að hafa níðst á súnní minnihlutanum í landinu. Meðlimir ISIS eru súnníar.

Uppreisnarmennirnir hafa nú stjórn á stórum landsvæðum í norður og vesturhluta landsins, þar á meðal næst stærstu borginni Mosul. Þá stjórna þeir landamærunum inn í Sýrland og Jórdaníu og sækja nú að mikilli vatnsaflsvirkjun við borgina Haditha en nái þeir henni á sitt vald gætu þeir skrúfað fyrir rafmagnið í stórum hluta landsins.

Átökin gegn uppreisnarmönnum hafa kostað á annað þúsund manns lífið það sem af er júnímánuði og samkvæmt tölum frá eftirlitsmönnum á vegum Mannréttindastofnunnar Sameinuðu þjóðanna eru flestir þeirra föllnu óbreyttir borgarar.