Allsherjarnefnd sammála Hönnu Birnu um fækkun embætta

Allsherjarnefnd samþykkti rétt í þessu einróma lagafrumvarp um umfangsmikla fækkun sýslumanna- og lögreglustjóraembætta, sem Hanna Birna Kristjánsdóttir innanríkisráðherra mælti fyrir, fyrr í mánuðinum.

Frumvarpið var afgreitt án umfangsmikilla breytinga.

Fækka á umdæmum sýslumanna úr 25 í níu og lögregluumdæmum úr 15 í átta.

Lögreglustjóraembættin verða staðsett á höfuðborgarsvæðinu, Vesturlandi, Vestfjörðum, Norðurlandi vestra, Norðurlandi eystra, Austurlandi, Suðurlandi og Suðurnesjum.

Þessi tæplega helmings fækkun embætta hefur í för með sér að embættin stækka. Það verður svo í höndum innanríkisráðherra að ákveða hvar nákvæmlega hvert lögreglustjóraembætti verður staðsett í hverjum landshluta.