Örlítið jólalegur andi svífur yfir

„Við erum akkúrat að stilla upp flyglinum,“ segir Hlín Pétursdóttir Behrens sópransöngkona þegar hringt er í hana á föstudagskvöld. Hún er stödd í Norræna húsinu með þeim Pamelu de Sensi þverflautuleikara og Evu Þyri Hilmarsdóttur píanóleikara að undirbúa tónleika sem eiga að fara fram á morgun, sunnudag og hefjast klukkan 15.15, enda tilheyra þeir tónleikaröðinni 15.15.

„Dagskráin er draumkennd og glettin í senn,“ segir Hlín.

„Ævintýraheimur þúsund og einnar nætur kemur við sögu og forn ástarljóð frá Persíu en líka ástarljóð sem eru okkur nær í tíma. Við leituðum eftir því að fá þessa dagsetningu því við áttum þrjú falleg jólalög eftir Frank Martin. Svo ætlum við líka að flytja jólalag frá fyrri hluta tuttugustu aldarinnar um misraunhæfar jólagjafaóskir, svo það er örlítið jólalegur andi yfir tónleikunum,“ bætir hún við glaðlega.

Hún segir dagskrána að meginhluta franska en tónskáld frá Sviss og Bandaríkjunum komi líka við sögu. „Flest lögin eru fyrir okkur allar þrjár en þó séu aðeins frávik frá því. Við Pamela syngjum til dæmis tvö lög við undirleik Evu Þyriar,“ nefnir hún.



En af hverju heita tónleikarnir Í faðmi flautunnar? „Af því að bæði í ljóðum og tónlist hefur flautan aukið skáldum andagift. Hún er auk mannsraddarinnar, eitt elsta hljóðfæri mannkyns og tengir okkur við náttúruna og heim goðsagna og ævintýra,“ svarar Hlín.

Hún tekur fram að þó efnisskráin sé að mestu leyti á frönsku eigi það ekki að koma að sök því hún ætli að segja frá innihaldi og umhverfi ljóðanna.