Óli Geir er gjaldþrota

Ólafur Geir Jónsson, sem betur er þekktur sem Óli Geir, hefur verið úrskurðaður gjaldþrota. Þetta kemur fram í Lögbirtingarblaðinu. Gjaldþrotaskipti voru tekin fyrir í Héraðsdómi Reykjaness 20. febrúar þessa mánaðar.

Óli Geir hefur verið áberandi á undanförnum árum í skemmtanalífinu. Hann var svo helsti forsvarsmaður Keflavík Music Festival sem mjög var til umfjöllunar síðasta sumar. Fjölmargir tónlistarmenn stukku frá borði vegna vanefnda.

Í sérstakri yfirlýsingu sem Óli Geir sendi frá sér í desember sagðist hann, ásamt Pálma Þór Erlingssyni, hafa tapað öllum sínum eigum vegna hátíðarinnar. Vísað er í sögusagnir um að hann hafi horfið af landi brott með gróðann en þessu er vísað á bug í yfirlýsingunni; hátíðin kom út í 30 milljóna króna mínus.

„Við töpuðum eignum okkar, bifreiðum okkar, við töpuðum öllu. Á meðan við vorum að afsala þessu öllu þá hélt fólk virkilega að við værum að svíkja allt og alla.“

Fréttastofu tókst ekki að ná tali af Óla Geir vegna þessa.