Strauk getnaðarlim tíu ára drengs

Rúmlega fertug kona hefur verið dæmd af Héraðsdómi Reykjavíkur í fjögurra mánaða skilorðsbundið fangelsi fyrir að strjúka getnaðarlim 10 ára drengs á heimili hans.

Konan og drengurinn eru af erlendu bergi brotin og í dómnum kemur fram að hún sé tengd honum fjölskylduböndum og hann líti á konuna sem einskonar ömmu.

Konan játaði að hafa lyft getnaðarlimi drengsins þegar hann labbaði nakinn fram hjá henni að koma úr sturtu. Hún sagði það hafa verið gert í stríðni. Móðir drengsins var á staðnum þegar atvikið átti sér stað. Hún sagði þau öll hafa verið að stríða hvert öðru en þegar konan hefði komið við getnaðarlim drengsins hafi hann beðið hana að hætta og hún hafi gert það.

Drengurinn sagði fullorðnum manni frá því sem gerst hafði og að sér hefði þótt það óþægilegt. Fyrir dómi sagði hann móður sína hafa sagt við sig að þetta væri „djók“. En að honum liði illa og hefði grátið yfir þessu.

Í niðurstöðu dómsins segir að drengnum hafi verið misboðið við háttsemi konunnar og að atvikið hefði valdið honum vanlíðan. Með broti sínu hefði konan brugðist trúnaðartrausti drengsins sem hún tengdist fjölskylduböndum.