Strandveiðibátar mættir á miðin

Yfir 300 strandveiðibátar voru farnir til veiða klukkan sex í morgun, en nú er fyrsti dagur veiðannna í ár.

Þær skiptast í fjögur svæði umhverfis landið og er hvert veiðitímabil í mánuð, næstu fjóra mánuðina. Hver bátur má mest koma að landi með 700 til 800 kíló af óslægðum fiski á dag, en það er nokkuð breyitlegt eftir fisktegundum. Minnst má koma með af ýsu, þar sem hún er talin dýrmætasti bolfiskurinn um þessar mundir.

Að sögn Stjórnstöðvar Landhelgisgæslunnar tóku bátarnir að streyma út upp úr klukkan þrjú í nótt þannig að þar á bæ hefur verið mikið álag á starfsmenn við að taka á móti tilkynningum frá öllum þessum fjölda. Til viðbótar eru um það bil 300 önnur fiskiskip á sjó við landið.