Foreldrar svindluðu á könnun

Foreldrafélögin við Þingeyjarskóla sendu fyrr í mánuðinum út könnun til foreldra barna skólans sem kanna átti hug þeirra til skólahalds við Þingeyjarskóla. Í ljós kom að vegna tæknilegs ágalla á framkvæmd könnunarinnar var hægt að svara henni oft. Einhverjir foreldrar sáu sér því leik á borði og svindluðu á könnuninni svo ákveðið var að birta ekki niðurstöðurnar.

Sagt er frá þessu á vefnum 641.is.

Könnunin var ein spurning með fimm svarmöguleikum. Fleiri svör bárust þó en foreldrafjöldi skólans segir til um og við athugun foreldrafélagsins kom í ljós að nokkuð var um að mörg svör bærust frá sömu ip-tölunni. Samkvæmt 641.is voru dæmi um að allt að tíu svör bærust frá sömu ip-tölunni.

Foreldrafélögin segja að ekki sé búið að ákveða hvort önnur könnun verði framkvæmd og þá með hvaða hætti.

Uppfært 17:55

Víðir Pétursson frá foreldrafélagi Hafralækjaskóla hafði samband við Vísi og segir ekki vera hægt að halda því fram að foreldrar hafi svindlað. Svarafjöldi hafi í raun ekki verið hærri en fjöldi foreldra sem könnunin var lögð fyrir.

Ástæða þess að hætt hafi verið við að birta niðurstöður könnunarinnar hafi verið vegna þess tæknilega galla að mögulegt var að svara oftar en einu sinni. Ekki væri hægt að færa sönnur fyrir því að nokkurt foreldri hafi gert það. Þó sama ip-talan hafi komið fyrir oftar en einu sinni, geti það átt sér eðlilegar ástæður.