Söguleg útvíkkun á norrænu samstarfi

Utanríkis- og varnarmálaráðherrar Norðurlandanna lýsa loftvarnaæfingunni sem nú stendur yfir á Íslandi sem sögulegri útvíkkun á norrænu samstarfi. Tugir norrænna fréttamanna voru mættir á Keflavíkurflugvöll í dag til að fylgjast með, flestir frá Finnlandi og Svíþjóð.

Þar sem eitt sinn stóðu bandarískar kafbátaleitarvélar, þar sjást nú hervélar með norræna fána á stélinu. Og þar sem höfuðstöðvar Varnarliðsins voru áður, þar blakta nú fánar Norðurlanda. Ráðherrarnir leggja ríka áherslu á að þetta sé ekki NATO-aðgerð heldur norrænt samstarf.

Allir utanríkis- og varnarmálaráðherrar Norðurlandanna lögðu leið sína til Íslands, ásamt nærri þrjátíu erlendum fréttamönnum. Samnorræn heræfing með aðild Finnlands og Svíþjóðar, ríkja sem ekki eru í NATO, þykja söguleg tíðindi fyrir norrænt varnarsamstarf. „Þetta er sögulegt,” sagði Carl Bildt, utanríkisráðherra Svíþjóðar, í viðtali við Stöð 2. Undir það tók íslenski starfsbróðir hans, Gunnar Bragi Sveinsson.

Carl Bildt segir að flugherir Svía og Finna hafi haft mikið samstarf í Norður-Skandinavíu. „Og nú vinnum við saman hér í Keflavíkurstöðinni. Það leggur grundvöll að ennþá nánara æfingasamstarfi. Það er eitthvað til að byggja meira upp,” segir Bildt.

„Nú er mikil samstaða í Finnlandi og Svíþjóð að taka þátt í þessu verkefni því menn sjá að þetta er útvíkkun á norrænu samstarfi. Þessar þjóðir eru ekki að ganga í NATO,” segir Gunnar Bragi.

En hver eru mikilvægustu skilaboðin sem ráðherrarnir eru að senda? „Ég held að það sé samstaða Norðurlandanna,” svarar finnski utanríkisráðherrann Erkki Tuomioja. Norrænu ríkin geti lagt sitt af mörkum til lausna á alþjóðlegum deilum til að gera heiminn  traustari og öruggari.