Segir Vodafone ekki vilja afhenda gögn

Skúli Sveinsson, hæstaréttarlögmaður hjá Lögvernd, segir að erfiðlega hafi gengið að afla gagna frá Vodafone vegna hópmálsóknar Málsóknarfélagsins gegn fyrirtækinu.

„Þeir hafa neitað að afhenda gögn nema til núverandi viðskiptamanna sinna. Bæði hafa þeir sem hafa verið í samskiptum við önnur símafyrirtæki ekki fengið upplýsingar um skeyti sem þeim hefur verið sent og einnig þeir sem hafa verið hættir [hjá Vodafone] ekki fengið upplýsingar um þessi skeyti. Þetta er eitthvað sem verður sjálfsagt ágreiningur um, reikna ég með,“ segir Skúli, sem fer fyrir Málsóknarfélaginu.

Hann bætir við að viðbrögðin við auglýsingu sem birtist í Fréttablaðinu í gær um hópmálsóknina hafi verið mjög mikil. „Það hefur mikið af fyrirspurnum og umsóknum komið inn,“ segir hann. „Við reiknuðum aldrei með að allir myndu sækja um fyrsta daginn en ætli þetta sé ekki í takt við það sem við áttum von á.“

Skúli telur að ýmislegt eigi eftir að koma í ljós í málarekstrinum. „Af því sem fram hefur komið er margt sem bendir til þess að þarna hafi verið verulega pottur brotinn.“

Skæð tölvuárás var gerð á heimasíðu Vodafone 30. nóvember í fyrra þar sem lekið var á netið persónuupplýsingum fjölda notenda. Tyrkneskum hakkara, sem kallaði sig Maxney, tókst að hakka sig inn í kerfi Vodafone og ná meðal annars í SMS-skilaboð viðskiptavina. Hakkarinn náði í mjög viðkvæmar persónuupplýsingar um notendur fyrirtækisins sem hann birti síðan á netinu.

Fleiri þolendur lekans eru að undirbúa málshöfðun gegn fjarskiptafyrirtækinu með aðstoð Réttar, eins og Fréttablaðið greindi frá í byrjun árs.

Aðspurð segir lögmaðurinn Björg Valgeirsdóttir að Réttur tengist ekki Málsóknarfélaginu. Hún segir stofuna ekki hafa rannsakað hvort tilefni sé til að fara í hópmálsókn enda séu mál umbjóðenda þeirra ekki þannig vaxin. Þau séu öll mjög viðkvæm. „Málin eru í farvegi og hafa verið í vinnslu hér frá því strax í kjölfar lekans,“ segir hún.

Ekki náðist í Hrannar Pétursson, upplýsingafulltrúa Vodafone, við vinnslu fréttarinnar.