Peanut krýndur ljótasti hundur í heimi

„Peanut er einn ljótasti hundur sem tekið hefur þátt í keppninni. Hann er bara hryllilegur,“ sagði Brian Sobel, einn dómaranna í keppninni Worlds Ugliest Dog eða Ljótasti hundur í heimi.

Hinn tveggja ára gamli rakki Peanut var í gær krýndur ljótasti hundur í heimi í borginni Petaluma í Kaliforníu. Að sögn viðstaddra bar hann höfuð og herðar yfir alla aðra keppendur. Hundurinn Quasi Modo þótti sigurstranglegur en fékk hann þó einungis 671 atkvæði á meðan Peanut fékk 1.795 atkvæði.

„Ekki láta tennur hans hræða ykkur! Hann er ekki að urra. Hann er að brosa,“ segir Holly Chandler, eigandi Peanut. „Þrátt fyrir að andlit hans hafi hrætt marga í burtu, þá hefur það brætt hjarta mitt.“

Peanut hafði þurft að sæta illri meðferð fyrstu mánuði lífs síns og var hann brenndur víðs vegar um líkamann sem skýrir á nokkurn hátt útlit hans. Hann var fluttur í dýraathvarf og níu mánuðum síðar tók Holly hann að sér.

Hundurinn Elwood, sem krýndur var ljótasti hundur í heimi árið 2007 og eflaust margir kannast við, eignaðist dyggan aðdáendahóp og kom fram á meira en tvö hundruð viðburðum. Þá safnaði hann mörg þúsund dollurum fyrir ýmis konar samtök sem bjarga dýrum. Elwood drapst í lok síðasta árs.