Manngengur bronsjógi í Esjuhlíðum

„Þetta er táknrænt fyrir það að maður fer inn í sjálfan sig að leita að friði,“ segir Marteinn Arnar Marteinsson hjá Sri Chinmoy-miðstöðinni sem nú íhugar nú að kaupa land við rætur Esjunnar undir rúmlega þrettán metra háa og manngenga bronsstyttu af Chinmoy.

Í lok nóvember í fyrra var sagt í Fréttablaðinu frá sömu styttu sem þá var sótt um að setja upp í skógræktarlandinu Lundi við Mógilsá. Um er að ræða listaverk tileinkað friði hannaða af Englendingnum Kaivaliya Torpy sem gert hefur margar styttur af Chinmoy víða um veröld. Styttan á Íslandi yrði hins vegar sú langstærsta af hinum heimsþekkta indverska gúrú og kraftlyftingamanni sem lést árið 2007.

Marteinn Arnar segir landið í Esjuberg vera til skoðunar ásamt landi í Mosfellsbæ auk þess sem Lundur sé ekki enn út úr myndinni. Menn séu enn að þreifa fyrir sér þar sem álitlegt land sé til sölu.

Tákn um velvild út í samfélagið

„Þessi samtök hafa staðið fyrir að koma á sátt og velvild á milli þjóða og ólíkra hópa. Það eru þúsundir staða sem eru nefndir friðarborgir og friðarstaðir út um allan heim,“ segir Marteinn Arnar sem kveður styttuna af Sri eiga að vera tákn um velvild út í samfélagið.

„Þetta á að verða vin í eyðimörkinni frá daglegu stressi. Fólk mun fá aðgang þarna inn en alls ekki þannig að það trufli nágrannana,“ segir Marteinn Arnar. Ef af verði muni meðlimir Sri Chinmoy-miðstöðvarinnar planta trjám og útbúa tjarnir þannig að lóðin umhverfis styttuna líkist meira garði.

Skoðað í hverfisráði Kjalarness

Skipulagsfulltrúinn í Reykjavík hefur vísað umsókn um að fá að reisa styttuna í Esjubergi til umsagnar hjá hverfisráði Kjalarness. Marteinn Andri neitar því ekki að Chinmoy-styttan myndi sem mannvirki hafa mikla sérstöðu hérlendis. Ekki sé ætlunin að styggja neinn.

„Þetta er táknræn útfærsla á innri friði og því að róa niður hugann og komast í sátt við sjálfan sig eftir eril dagsins. Maður fer inn í þessa styttu eins og maður fer inn í sjálfan sig.“