Frambjóðendur beðnir að undirrita sjálfsskuldarábyrgð

Frambjóðendur í efstu sætum á fyrri lista Framsóknarflokksins til komandi borgarstjórnarkosninga voru beðnir um að skrifa undir sjálfsskuldarábyrgð fyrir lántöku í tengslum við kosningabaráttuna.

Samkvæmt heimildum Fréttablaðsins var sjálfsskuldarábyrgðin mismikil eftir sætum en ætlast var til þess að oddviti listans gengist undir hæstu ábyrgðina eða um átta og hálfa milljón króna. Annað sæti listans átti að gangast undir ábyrgð upp á fimm og hálfa milljón, það þriðja upp á þrjár og hálfa milljón og næstu tvö sæti upp á eina og hálfa milljón króna hvort. Beiðni um sjálfsskuldarábyrgð kom fram á fundi frambjóðenda og kjörnefndar Framsóknarflokksins fljótlega eftir að raðað var á lista en var slegin út af borðinu af frambjóðendum. Enginn í efstu sætum listans var tilbúinn að skrifa undir sjálfsskuldarábyrgð.

Samkvæmt heimildum Fréttablaðsins stóð fjárhagur framboðs Framsóknarflokksins veikum fótum. Guðrún Bryndís Karlsdóttir, sem sat á lista Framsóknar í Reykjavík, segir að margar hugmyndir hafi verið uppi um fjármögnun framboðsins. „Ein þeirra leiða var að fjársterkir einstaklingar myndu styrkja framboðið um meira en 400 þúsund en styrkirnir yrðu skráðir sem kaup á happdrættismiðum.“ Fréttablaðið hefur ekki heimildir fyrir því að þessar hugmyndir hafi orðið að veruleika. Samkvæmt lögum um fjármál stjórnmálasamtaka er flokkum óheimilt að taka á móti fjárframlögum yfir 400 þúsund krónum.

Þorsteinn Magnússon, gjaldkeri kjördæmaráðs Framsóknarflokksins í Reykjavík, segist ekki vita nákvæmlega hvaða fjáröflunarhugmyndir hafi verið ræddar. Hann fullyrðir hins vegar að ekkert happdrætti hafi verið haldið og að öll framlög sem þegin hafi verið séu vel innan þeirra marka sem lög kveða á um.

Þórir Ingþórsson, formaður kjördæmaráðsins, vill ekki staðfesta að frambjóðendur hafi verið beðnir um að ganga í fjárhagslegar ábyrgðir fyrir framboðið. „Ég get staðfest að kosningabaráttan er ekki fjármögnuð með lántöku,“ segir hann.

Samkvæmt skoðanakönnunum síðastliðinna vikna nær Framsóknarflokkurinn ekki inn manni í borgarstjórn en flokkurinn þurrkaðist út úr borgarstjórn í síðustu kosningum.