Æskulýðsprestur ekki ákærður

Séra Ninna Sif Svavarsdóttir, æskulýðsprestur í Selfosskirkju, verður ekki ákærð fyrir að sýna börnum kynfæri fólks í fermingarfræðslu. Þetta segir Þorgrímur Óli Sigurðsson, aðstoðaryfirlögregluþjónn lögreglunnar í Árnessýslu, í samtali við Vísi.

Séra Ninna fékk Siggu Dögg kynfræðing til að koma og halda fyrirlestur um samskipti kynjanna. Fyrirlesturinn var hluti af fermingarfræðslu kirkjunnar. Sigga Dögg sýndi þá myndir af kynfærum en séra Ninna var kærð til lögreglu þar sem þeir sem kærðu töldu hana ábyrga fyrir öllu sem fram fer í fermingarfræðslunni.

Lögreglan tók málið til rannsóknar og hefur nú lokið henni. Ekki eru taldar líkur á sakfellingu í málinu og hefur það því verið fellt niður.