Breyttu húsi afa og ömmu í veitingastað - fengu fullt hús stiga hjá Tripadvisor

„Amma mín og afi byggðu þetta hús fyrir um það bil hundrað árum síðan á grunni gripahúsa sem voru þarna. Það var kominn tími á að gera það upp, enda orðið þreytt og illa farið, og því ákváðum við, barnabörn Ingimars og Helgu sem byggðu húsið, að breyta því í veitingastað,“ segir Ingibjörg Baldursdóttir.

Hún rekur veitingastaðinn Kaffi Ilm á Akureyri ásamt systur sinni Helgu og Þórhildi Þórhallsdóttur. Þær stöllurnar fengu á dögunum viðurkenningu um yfirburði frá ferðavefsíðunni Tripadvisor. Fær veitingastaðurinn fimm stjörnur á síðunni en stjörnugjöfin er byggð á umsögnum viðskiptavina.

„Við höfum fylgst með gangi mála á Tripadvisor en fyrir einni eða tveimur vikum fengum við skjalið sent í pósti. Það var voðalega gaman að fá það staðfest að við værum meðal bestu veitingahúsa á Akureyri. Við fáum fullt hús stiga og það er yndislegt,“ segir Ingibjörg.

Kaffi Ilmur var opnað 19. maí árið 2010 í Skátagili og leggja eigendurnir mikið upp úr góðu andrúmslofti.

„Við ákváðum að halda í allt sem var heillegt í húsinu. Við tókum til dæmis gólfdúkana af efri hæðinni sem eru frá 1940 eða 1950 og þeir prýða borðplöturnar í dag. Allur panell í húsinu er einnig upprunalegur. Ég þekki ýmsar sögur úr húsinu og segjum við gjarnan ferðamönnum sögur ef við höfum tíma. Til dæmis þegar amma var kvödd í húsinu og kistan var látin síga út um gluggann eins og tíðkaðist á þeim tíma. Það gefur fólki innsýn í hvernig lífið var í kringum 1920 til 1930. Ég er búin að skrá sögurnar en er ekki búin að gefa þær út þó ég hafi hug á því. Við eigendurnir erum konur á besta aldri og leyfum okkur að fara aðeins út fyrir rammann ef það hentar,“ segir Ingibjörg. 

Hún segir marga ferðamenn koma dag eftir dag til að fá sér hressingu. „Það er gaman að geta boðið upp á ákveðin tengsl við viðskiptavini og tengst fólkinu. Það er pínulítill heimilisbragur á þessu hjá okkur,“ segir Ingibjörg glöð í bragði.

Nokkrar umsagnir ferðamanna á Tripadvisor

„Yndislegt kaffihús og espressóið er afbragð. Andrúmsloftið er hlýlegt og þægilegt. Ég mæli með því að koma við þarna og fá sér kaffi.“

„Besta swiss mocha á Akureyri. Eigandinn var mjög vinalegur og hjálpsamur: yndislegur lítill staður. Mjög heimilislegur og þægilegur.“

„Æðislegt lítið kaffihús í gamalli byggingu. Konan sem á það gerir stórkostlegar kökur og býður mann hjartanlega velkominn.“

„Stórkostlegt, sterkt latte og falleg verönd. Fullkominn staður til að stoppa við og lesa eða skrifa á póstkort.“