Norskir útgerðarmenn vilja bætur

Samtök norskra útgerðarmanna hafa sent norska sjávarútvegsráðuneytinu bréf og fara þess á leit að stjórnvöld krefji Íslendinga um bætur eftir dræma loðnuvertíð. Fiskifréttir greina frá þessu.

Loðnukvóti Norðmanna í íslenskri lögsögu var um 41 þúsund tonn. Loðan lét hins vegar ekki sjá sig framan af ári og tókst norskum útgerðum aðeins að veiða rúmlega 6 þúsund tonn áður en veiðitímabili þeirra lauk. Sigurður Ingi Jóhannsson framlengdi veiðitímabil Norðmanna um eina viku í febrúar en þá voru margar norskar útgerðir búnar að gefast upp á leitinni.

Loðnukvótinn til íslenskra útgerða var aukinn um 38 þúsund í síðustu viku og stærsti hluti þeirrar úhlutunar var kvóti sem Norðmönnum tókst ekki að veiða. Heildarkvóti íslenskra útgerða á þessari vertíð verður því 123 þúsund tonn.

Norskir útvegsmenn eru þeirrar skoðunar að íslensk stjórnvöld séu að stórum hluta ábyrg fyrir því að norsku skipin hafi ekki náð að fiska kvóta sinn vegna þeirra takmarkana í tíma og rúmi sem þau hafi sett veiðunum.

Norskir útgerðamenn vilja auknar botnfiskheimildir í íslenskri lögsögu og aukinn úthafskarfakvóta innan og utan lögsögu við Íslands. Benda þeir á það fordæmi að Ísland hafi úthlutað Norðmönnum rækjukvóta sínum við Flæmingjagrunn, 334 tonnum, eftir loðnuvertíðina 2008/09.