Jólamarkaður netverslana

Jólamarkaður netverslana verður haldinn í þriðja sinn um helgina og með öðru sniði en venjulega þar sem hann stendur nú yfir í þrjá daga, frá sunnudegi fram til þriðjudags. Fimm netverslanir kynna og selja þar fjölbreytt úrval af vörum og ættu allir að finna eitthvað við sitt hæfi að sögn Rakelar Hlínar Bergsdóttir, eins skipuleggjanda markaðarins.

„Jólamarkaðurinn í ár verður nokkurs konar „pop-up“búð þar sem fólki gefst tækifæri á að skoða og kaupa vörur frá okkur. Við munum bjóða upp á fjölbreytt úrval vara fyrir heimilið og börn auk snyrtivara. Við leggjum mikið upp úr jólalegri stemningu enda hefst markaðurinn á fyrsta sunnudegi í aðventu.“ Netverslanirnar fimm eru Petit.is, Nola.is, Snúran.is, Esjadekor.is og Krúnk Living.

Viðtökur almennings við fyrri mörkuðum fóru fram úr björtustu vonum skipuleggjenda. „Við finnum svo vel hvað fólk hefur gaman af því að sækja svona markaði og sjá vörurnar með eigin augum. Það er augljóst að margir hafa legið yfir netsíðunum okkar og vita alveg nákvæmlega hvað þeir ætla að skoða. Svo er líka svo gaman að hitta viðskiptavini okkar auglitis til auglitis.“

Rakel segir að alltaf séu einhverjir sem treysti sér ekki til að panta vörur á netinu án þess að hafa séð þær. „Þannig eru svona markaðir frábært tækifæri til að koma og skoða vörur og tala við okkur um leið. Við finnum líka að þegar fólk hefur komið og séð vöruna þá verslar það næst á netinu.“

Hún segir markaðinn einnig gott tækifæri fyrir þá sem vilja vera snemma í jólainnkaupunum og njóta þess að slaka á með fjölskyldunni yfir aðventuna. „Það eru ekki allir sem gera skyndikaup heldur þurfa umhugsunarfrest. Þannig eru netverslanir okkar góður kostur en þær bjóða allar upp á frábæra þjónustu með afhendingu samdægurs ef fólk sækir vöruna. Annars fær það vöruna senda heim innan tveggja daga.“

Til að auka enn frekar jólastemninguna verða Te & kaffi, Miriam Candles og Hafliði Ragnarsson frá Mosfellsbakaríi á staðnum. „Hægt verður að kaupa jólakaffi og smakka og kaupa gómsætt konfekt frá Hafliða. Svo er það rúsínan í pylsuendanum; happadrætti þar sem hver verslun gefur vinninga að verðmæti 10.000 kr.“

Jólamarkaður netverslana verður haldinn í Ferðafélagssalnum í Mörkinni í Reykjavík. Opið verður á sunnudag frá kl. 12-18 og á mánudag og þriðjudag frá kl. 17-21. Nánari upplýsingar má finna á Facebook undir Jólamarkaður netverslana.