Er áttræð og yrkir dýrt

„Viðtal? Ég veit ekki hvort ég hef tíma í það. Því eldri sem maður verður því meira er að gera,“ segir Ragna Guðvarðardóttir sem er áttræð í dag en má ekki vera að því að halda upp á það fyrr en næsta laugardag, 22. nóvember.

Hún er á förum austur í Þorlákshöfn að lesa upp ljóð þegar ég næ í hana í síma, svo afmælisviðtalið snýst upp í ljóðaspjall í byrjun.

„Ég hef verið í ljóðahópi eldri borgara í Gjábakka í Kópavogi í fjórtán ár og við höfum gefið út eina bók á ári sameiginlega. Þórður Helgason dósent hefur verið með okkur allan tímann, kennt okkur og aðstoðað okkur í bókaútgáfunni,“ segir Ragna og heldur áfram.

„Svo hafa einstaklingar innan hópsins líka gefið út bækur, þar á meðal ég. Mín bók heitir Ljóðaland og öll ljóðin í henni eru ort undir dróttkveðnum bragarhætti.“

Er langt síðan þú tileinkaðir þér hann? „Það kom smátt og smátt að ég fór að velta honum fyrir mér í ljóðahópnum. Mér fannst hann svo sérstakur.“

Er ekki afar vandasamt að yrkja dróttkveðið? „Það er svona eins og að ráða krossgátur. Maður þarf að vera dálítið góður í íslensku því tvö orð í hverri línu þurfa að vera af sama stofni, þau ríma í annarri hvorri línu en ekki í hinni. Svo er líka stuðlun en ekki endarím. Þetta er sama form og notað var í Íslendingasögunum.“

Varstu byrjuð að yrkja áður en þú fórst í Gjábakkahópinn? „Ég hafði sett saman ferskeytlur og gamanbragi en ekki ljóð sem hægt er að kalla því nafni.“

Hvaðan ertu? „Ég er úr Fljótunum í Skagafirði. Frá bænum Minni-Reitir, frændi minn býr þar núna. Ég fór að heiman um tvítugt og var í vinnu hingað og þangað um landið til að byrja með en flutti til Reykjavíkur 1968 og í Kópavoginn 1978.“

Spræk og heilsuhraust? „Já, eins og er. Ég hef svo sem orðið veik en alltaf hjarnað við aftur.“

Þú sagðist hafa fullt að gera, er það félagslífið sem þú stundar svona stíft?

„Já, ég er í kór eldri borgara hér í Kópavogi og í danshóp sem iðkar línudans, svo spila ég boccia. Ég var reyndar að koma úr saumaklúbbi núna. Við skólasystur af Varmalandi erum búnar að vera með saumaklúbb í fjölda ára.“

Hvernig ætlarðu að halda upp á afmælið næsta laugardag? „Ég ætla að hafa opið hús í Gjábakka. Þar verður örugglega mikið sungið. Dótturdóttir mín er söngkennari í verkfalli svo hún hefur nógan tíma til að skipuleggja söngatriði.“