Rúnar: Búið að hrauna yfir Kjartan á Stöð 2 í tvö ár

Rúnar Kristinsson, þjálfari KR, segir að það sé búið að eyðileggja orðspor Kjartans Henrys Finnbogasonar.

Kjartan Henry fékk að líta tvær áminningar í kvöld og þar með rautt. Fyrra spjaldið fékk hann fyrir leikaraskap og það síðara fyrir að toga varnarmann Stjörnunnar niður.

„Þetta var brot sem breytti ekki miklu fyrir leikinn og aðeins annað brotið hans í leiknum,“ sagði Rúnar um síðari áminninguna í viðtali við Ríkharð Óskar Guðnason eftir leikinn.

„En af því að þetta er Kjartan og það er búið að hrauna yfir hann á Stöð 2 undanfarin tvö ár og alltaf að vera að tala illa um hann - þá er hann fórnarlamb þess.“

„Hann fær sjaldan orðið aukaspyrnu og það er rosalega mikið dæmt á hann.“