Enginn fór úr að ofan á kvennakvöldi Blika

Margrét Júlía Rafnsdóttir, verkefnastjóri Barnaheilla, heldur því fram að konur á kvennakvöldi Breiðabliks hafi farið yfir öll velsæmismörk og áreitt unga drengi kynferðislega. Hannes Friðbjarnarson tónlistarmaður var veislustjóri og upplifun hans var allt önnur en Margrétar Júlíu.

Boðið í piltana

Kvennakvöld var haldið síðastliðið laugardagskvöld. Margrét Júlía var viðstödd og henni var brugðið vegna atgangsins. Hún segir, í samtali við Vísi, að miðaldra konur hafi áreitt unga drengi, liðsmenn meistaraflokks Breiðabliks í knattspyrnu sem þarna voru mættir, fjórir eða fimm, til að selja happadrættismiða. Þær hafi krafist þess að drengirnir færu úr að ofan og einhver þeirra vildi bjóða í piltana. „Ég hefði getað grátið af skömm fyrir kynsystrum mínum og vegna þessarar ömurlegu stöðu sem drengirnir voru settir í,“ segir Margrét Júlía.

Blikar harma gjörninginn

Knattspyrnudeild Breiðabliks hefur sent frá sér yfirlýsingu vegna málsins þar sem harmað er að upplifun Margrétar Júlíu hafi verið með þessum hætti. Þar kemur fram að vilji sé til að hafa í heiðri siðareglur félagsins og jafnréttisstefnu -- hún verði brýnd fyrir aðstandendum kvöldsins. Undir þetta ritar Eysteinn Pétur Lárusson framkvæmdastjóri Knattspyrnudeildar Breiðabliks.

Fréttastofa náði tali af Borghildi Sigurðardóttur snemma í morgun vegna málsins, en hún er formaður knattspyrnudeildarinnar. Hún ætlaði að athuga málið en hefur ekki svarað síma aftur eftir þetta þrátt fyrir ítrekaðar tilraunir Vísis/Bylgjunnar.

Eitt tilboð sem ekki hlaut hljómgrunn

Veislustjóri á kvennakvöldi Blika var tónlistarmaðurinn Hannes Friðbjarnarson og honum er ekki skemmt. Hans upplifun er allt önnur en Margrétar, Hannes segir engan hafa farið úr að ofan.

„Ég upplifði þetta þannig að það fór enginn úr að ofan.“ Hannes segist hafa verið þarna lungann úr kvöldin og hann hafi fengið staðfestingu þess efnis að enginn hafi farið úr að ofan eftir að hann hvarf af vettvangi.

Þá kannast Hannes ekkert við að nokkurt kynferðislegt áreiti hafi átt sér stað. „Ég get ekki tekið undir það. Ég veit að það var ein kona sem fór fram á það að hún ætlaði að kaupa ákveðinn fjölda af miðum í skiptum fyrir það að einhver færi úr að ofan. Hún fékk ekki mikinn hljómgrunn í salnum. Þannig að það dó með sjálfum sér, þetta tilboð. Það er það eina sem gerðist þetta kvöld.“

Ekkert kynferðislegt við framgöngu piltanna

Þannig að þú vilt meina að þetta sé hálfgerður stormur í vatnsglasi?

„Þetta er fárviðri í vatnsglasi. Þetta er gömul saga og ný með kvenna- og herrakvöld á Íslandi. Eða, þetta hefur örugglega verið öðruvísi hér áður fyrr. En það er, held ég búið með þessar íþróttir.“

Margrét Júlía segir drengina hafa verið miður sín eftir þessa reynslu en Hannes kannast ekki við neitt slíkt. Drengirnir mættu í sínu fínasta pússi og ekkert kynferðislegt við þeirra framgöngu, að sögn Hannesar.

„Ég talaði við þá alla á sunnudeginum. Og þeir báru sig vel. Seldu glás af happadrættismiðum. Það kannast enginn þeirra við kynferðislega áreitni og hún verður þá að nefna einhver nöfn.“