Framvísi heimild fyrir „íþyngjandi“ takmörkunum á Þingvöllum

Tvö sveitarfélög á Suðurlandi vilja að Vegagerðin og Þingvallanefnd vísi til lagaheimilda fyrir því að setja mun strangari hömlur á umferð um Þingvallaþjóðagarð en aðalskipulag svæðisins geri ráð fyrir.

Þetta kemur fram í minnisblaði Valtýs Valtýssonar. sveitarstjóra í Bláskógabyggð. Bæði er um að ræða þungatakmarkanir og hraðatakmarkanir sem innleiddar voru á Þingvöllum til að draga úr mengun og auka öryggi.

Á sameiginlegum fundi sveitarstjórna Bláskógabyggðar og Grímsnes- og Grafningshrepps var rætt um að sveitarfélögin sendu frá sér sameiginlega áskorun til Vegagerðarinnar og Þingvallanefndar.

„Hömlur sem settar hafa verið, án samráðs við sveitarfélögin, hafa reynst íþyngjandi fyrir bændur svo og aðra sem sinna flutningi á aðföngum. Einnig hefur þetta veruleg áhrif á rekstrarumhverfi verktaka sem vegna vinnu sinnar og verkefna þurfa að fara um vegakerfi innan þjóðgarðsins,“ segir í minnisblaði Valtýs. Kallað sé eftir því að takmarkanirnar verði afnumdar og að þær verði í takt við aðalskipulag þar sem fyrr séu kvaðir sem lúta að verndun svæðisins.