Kassa af Blátt áfram ljósum stolið af ungum sölumönnum

Kassa af Blátt áfram ljósum var stolið af tveimur ungum sölumönnum í Bónus í Hafnarfirði á miðvikudaginn. Kassann geymdu þeir fyrir aftan sig á meðan þeir seldu ljós úr öðrum. Seinna tóku þeir eftir því að kassinn hafði verið tekinn.

Móðir annars drengsins, sem er fjórtán ára, segir í samtali við Vísi að þeir hafi ekki séð neinn taka kassann.

„Ég er búin að fara í Bónus, en það eru engar myndavélar einmitt á þessu svæði.“ Þá hefur hún beðið starfsmenn Bónus um að hringja í sig ef kassinn komi í leitirnar, ef einhver þeirra skyldi hafa tekið hann í misgripum.

„Það er mjög leiðinlegt að þessu hafi verið stolið, svo ekki sé hægt að selja ljósin til þessa góða málefnis. Þetta er alveg glatað og ég vona að þessi kassi finnist,“ segir hún.

Sala drengjanna gekk að öðru leyti mjög vel að sögn móðurinnar en þetta atvik sé mjög leiðinlegt. Hún segir son sinn vera sleginn yfir þessu og þetta hafi verið leiðinleg lífsreynsla.

Guðmundur Örn Jóhannsson sér um sölu Blátt áfram ljósanna og hann segir söluna, sem hófst á miðvikudaginn, hafa farið vel af stað og sölumönnunum hafi verið mjög vel tekið.

Hann segir 50 ljós vera í einum kassa sem samsvari um 100 þúsund króna tapi fyrir forvarnarsamtökin Blátt áfram.

„Við höfum aldrei áður upplifað svona atvik,“ segir Guðmundur.

Uppfært 15:15

Kassinn hefur fundist í rusli fyrir utan Bónus. Grunur leikur á að einhver hafi tekið kassann frá drengjunum og hent honum í ruslið fyrir utan verslunina.