Segja útii um friðarsamkomulag um Úkraínu

Úkraínski herinn hefur víða fengið óblíðar móttökur heimamanna og í borginni Sloviansk undirbjuggu íbúar sig í morgun fyrir yfirvofandi átök, þar sem herinn ætlaði að freista þess að ná borginni aftur á sitt vald eftir mánaðarlöng átök við aðskilnaðarsinna.

Herinn byrjaði á að umkringja Sloviansk og taka yfir flestar varðstöðvar aðskilnaðarsinna. Átökin fóru svo harðnandi og segir Alexander Turchinov, forseti Úkraínu, fjölmarga hafa fallið í dag. Staðfest hefur verið að minnst þrír aðskilnaðarsinnar og tveir óbreyttir borgarar séu látnir, auk tveggja flugmanna sem stýrðu herþyrlum sem skotnar voru niður. Fjórir menn voru fljótlega handteknir, grunaðir um að hafa grandað annarri þyrlunni.

Í yfirlýsingu síðla dags sagði Turchinov að aðgerðirnar gengu hægar en vonast hefði verið til en herinn hefði þó náð meirihluta borgarinnar á sitt vald.

Rússar hafa boðað neyðarfund í Öryggisráði Sameinuðu þjóðanna vegna átakanna í dag og sagði talsmaður Pútíns Rússlandsforseta að þau gerðu endanlega út um nýlegt friðarsamkomulag frá Genf. Þá munu aðgerðir hersins seinka því að fulltrúum Öryggis- og samvinnustofnunar Evrópu, sem verið hafa í gíslingu aðskilnaðarsinna í Donetsk, verði sleppt.

Í dag kom einnig til átaka í hafnarborginni Odessu og að sögn lögregluyfirvalda þar í borg lét að minnsta kosti einn lífið.