Símsvari Útlendingastofnunar einungis á íslensku

„Var það meðvituð ákvörðun þegar skilaboðin voru lesin inn á símsvarann að hafa þau eingöngu á íslensku? Ef svo var, hvaða röksemd bjó að baki þeirri ákvörðun,“ segir Birgitta Jónsdóttir, kafteinn Pírata í fyrirspurn sinni um símsvara Útlendingastofnunar sem einungis er á íslensku. Fyrirspurninni beinir Birgitta til Hönnu Birnu Kristjánsdóttur, innanríkisráðherra. Birgitta vakti athygli á málinu á vefsíðu sinni í dag.

„Hvers vegna var ekki tekið tillit til þess að hátt hlutfall skjólstæðinga Útlendingastofnunar skilur ekki íslensku,“segir hún jafnframt.

Þá vill hún vita hve lengi skilaboðin hafa verið á íslensku og hvaða mat liggi að baki því hvort einstakar fréttir eða upplýsingar á vef Útlendingastofnunar eru á öðrum tungumálum en íslensku.