Markasúpa Bjarka Más | 10,7 mörk í síðustu sjö leikjum

Það er óhætt að segja að Bjarki Már Elísson hafi farið á kostum með þýska handboltaliðinu ThSV Eisenach að undanförnu, en þessi 24 ára gamli hornamaður er á meðal markahæstu leikmanna næstefstu deildar þar í landi.

Bjarki, sem varð Íslandsmeistari með HK vorið 2012, kom til Eisenach í fyrra og skoraði 129 mörk í 34 leikjum (3,8 mörk að meðaltali í leik) á sínu fyrsta tímabili í atvinnumennsku.

Bjarki var í 30. sæti yfir markahæstu leikmenn efstu deildar í fyrra, en hann var jafnframt markahæsti Íslendingurinn í Bundesligunni á síðasta tímabili. Mörkin hans Bjarka dugðu þó skammt því Eisenach féll úr deild þeirra bestu síðasta vor.

Eisenach gekk brösuglega framan af tímabilinu og eftir átta leiki var Aðalsteini Eyjólfsson, þjálfara liðsins, sagt upp störfum en hann hafði stýrt Eisenach í fjögur og hálft ár. Við starfi hans tók Serbinn Velimir Petkovic sem hafði áður þjálfað Wetzlar og Göppingen í þýsku Bundesligunni.

Bjarki var rólegur í fyrstu átta umferðunum þar sem hann skoraði 23 mörk, eða 2,9 mörk að meðaltali í leik. En eftir þjálfaraskiptin fór hann í gang svo um munaði.

Bjarki skoraði átta mörk í fyrsta leik Eisenach undir stjórn Petkovic, í 38-30 sigri á Henstedt-Ulzburg. Í næstu þremur leikjum skoraði Bjarki samtals 15 mörk, áður en hann skoraði 10 mörk í fimm marka sigri Eisenach á Aue, öðru Íslendingaliði, 15. nóvember. Síðan þá hefur hornamaðurinn knái ekki litið um öxl.

Bjarki rauf tíu marka múrinn í næstu fimm leikjum Eisenach og hafði því skorað tíu mörk eða fleiri í sex leikjum í röð. Áður en að leiknum gegn Aue kom hafði hann aðeins átt einn 10-marka leik, í 26-26 jafntefli gegn Neuhausen 4. október.

Þessari ótrúlegu tíu marka hrinu Bjarka lauk á laugardaginn þegar hann skoraði "aðeins" níu mörk í öruggum sigri á Saarlouis en það var fimmti sigurleikur Eisenach í röð, en liðið er nú í 7. sæti B-deildarinnar.

Í síðustu sjö leikjum Eisenach hefur Bjarki skorað 75 mörk, eða 10,7 mörk að meðaltali í leik. Í heildina er hann kominn með 121 mark í B-deildinni í 19 leikjum, eða 6,4 mörk að meðaltali í leik. Bjarki er í 5. sæti yfir markahæstu leikmenn deildarinnar, en hann er 11 mörkum á eftir efsta manni á markalistanum, Philipp Weber sem spilar með toppliði Leipzig.

Eisenach á eftir að leika tvo leiki áður en hlé verður gert á deildakeppninni vegna HM í Katar. Á öðrum degi jóla tekur liðið á móti Empor Rostock og tveimur dögum síðar sækja Bjarki og félagar Nordhorn-Lingen heim.

Síðustu sjö leikir Bjarka Más í B-deildinni:

15. nóv: 33-28 sigur á Aue - 10 mörk

22. nóv: 36-29 tap fyrir Coburg - 10 mörk

29. nóv: 38-27 sigur á Emsdetten - 11 mörk

6. des: 26-30 sigur á Bad Schwartau - 11 mörk

10. des: 31-26 sigur á Bayer Dormagen - 11 mörk

14. des: 21-30 sigur á Eintracht Baunatal - 13 mörk

20. des: 39-30 sigur á Saarlouis - 9 mörk

Samtals: 75 mörk í sjö leikjum (10,7 að meðaltali í leik)