Guðmundar- og Geirfinnsmálin: Vill að ættingjar eigi kost á endurupptöku

Ögmundur Jónasson, þingmaður VG og fyrrverandi innanríkisráðherra , hefur lagt fram frumvarp á Alþingi í tengslum við Guðmundar- og Geirfinnsmálin. Frumvarpið snýr að því að ættingjar sakborninga eigi rétt á að leggja fram endurupptöku í málinu fyrir þeirra hönd.

Ögmundur er fyrsti flutningsmaður en níu þingmenn úr öllum flokkum eru meðflutningsmenn með frumvarpinu. 

Í greinargerð með frumvarpinu segir að allt frá dómsuppkvaðningu í Guðmundar- og Geirfinnsmálunum hafi sjónarmiðum ítrekað verið haldið á lofti þess eðlis að margt hafi farið alvarlega úrskeiðis við rannsókn málsins.

Þá er jafnframt vísað í skýrslu sem starfshópur á vegum innanríkisráðuneytisins skilaði inn í mars í fyrra. Hópurinn komst að rannsókn málsins hafi verið haldin ýmsum göllum og að misbrestir hafi orðið á skráningu gagna í málinu.

Einnig kemur fram að starfshópurinn telji að samkvæmt íslenskum lögum sem nú séu í gildi sé ekki unnt að beiðast endurupptöku dæmdra sakamála fyrir hönd látinna manna, en tveir af dómþolunum sex séu nú látnir. Þeir Sævar Marinó Ciesielski og Tryggvi Rúnar Leifsson.

„Að teknu tilliti til framangreinds og niðurstöðu skýrslu starfshóps um Guðmundar- og Geirfinnsmál er það mat löggjafans að nauðsynlegt sé að traust og tiltrú á réttarkerfið verði styrkt með þeim hætti að aðganga nákominna skyldmenna látinna dómþola í þessu sérstæða máli verði heimiluð að öðrum almennum skilyrðum fullnægðum. Þannig er opnað fyrir þann möguleika, ef tilefni er til endurupptöku samkvæmt almennum skilyrðum laga, að Guðmundar- og Geirfinnsmálið geti sætt endurupptöku gagnvart öllum hinum dómfelldu, hvort heldur sem þeir eru lífs eða liðnir, og þar með heildarendurskoðun,“ segir orðrétt í greinargerðinni.