Gísli ræddi við Sigríði daginn sem gögnin voru birt

Gísli Freyr Valdórsson, þáverandi aðstoðarmaður innanríkisráðherra átti í talsverðum samskiptum við Sigríði Björk Guðjónsdóttur, þáverandi lögreglustjóra á Suðurnesjum, daginn sem fréttir birtust byggðar á leka úr ráðuneytinu. Enn hefur ekki verið upplýst hvaðan gögn sem hann bætti við minnisblað ráðuneytisins komu. Þetta er fullyrt í DV í dag.

Gísli Freyr hefur verið dæmdur í átta mánaða skilorðsbundið fangelsi fyrir lekann. 

Samkvæmt frétt DV hringdi Sigríður einu sinni í Gísla Frey og hann tvívegis í farsímanúmer hennar daginn sem fréttir byggðar á lekanum voru birtar. Þá hafi hún einnig sent honum tölvupóst sama dag.

Sjá einnig: Atburðarásin í lekamálinu

Gísli Freyr hefur viðurkennt að hafa bætt við setningu aftast í trúnaðarskjalið sem hann hefur verið dæmdur fyrir að leka. Í þeirri setningu var vísað til þess að rannsóknargögn bentu til að hælisleitandinn Tony Omos hefði beitt barnshafandi konu þrýstingi til að segja að hann væri faðir barnsins.

Í samtali við fréttastofu RÚV segir Gísli Freyr að hann muni ekki hvað hann hafi rætt við Sigríði en að samtölin hafi verið tvö en ekki þrjú. Hann hefur ekki viljað upplýsa hvaðan hann fékk þær upplýsingar. Í viðtali við Kastljós sagðist Gísli ekki ætla að hætta á aðra ákæru með því að gefa það upp.

Sigríður Björk var í sumar skipuð lögreglustjóri á höfuðborgarsvæðinu af Hönnu Birnu í kjölfar uppsagnar Stefáns Eiríkssonar. Umboðsmaður Alþingis hefur nú til athugunar afskipti Hönnu Birnu af rannsókn lögreglunnar á lekamálinu sem heyrði beint undir Stefán.

Ekki náðist í Sigríði við vinnslu fréttarinnar.