Þorsteinn nú rétthafi lénsins DV.is

Sú breyting hefur verið gerð á skráningu vefsíðunnar DV.is að lénið er nú skráð á Þorstein Guðnason, stjórnarformann DV, en ekki á DV ehf. Með öðrum orðum er vefsíðan ekki lengur í eigu einkahlutafélagsins heldur Þorsteins.

Samkvæmt upplýsingum um skráningu léna á vefsíðunni ISNIC.is var síðasta breyting á skráningarskírteini DV.is gerð þann 10. október síðastliðinn. Nú er Þorsteinn einnig skráður sem greiðandi að léninu. DV.is er stærsta eign DV ehf.

„Ég hef ekkert um málið að segja,“ sagði Þorsteinn þegar Vísir náði af honum tali fyrir stundu.

Uppfært klukkan 18.07

Í tölvupósti sem Hallgrímur Thorsteinsson, ritstjóri DV, sendi í kvöld kemur fram að unnið sé að lagfæringu á skráningunni. „Það stóð aldrei til að breyta því að DV ehf er rétthafi DV.is lénsins,“ segir Hallgrímur. „Það þurfti að breyta um tæknilegan tengilið og greiðanda fyrir lénið í skráningunni hjá Isnic vegna mannabreytinga á DV í haust. Eitthvað skolaðist til í þeirri umskráningu.“

Hann segir að unnið sé að því að skrá DV ehf. aftur sem rétthafa lénsins.