Vikan á Vísi: MDMA, fjall á flugi, bíll á hvolfi og dýrkeypt djamm

Bíll og hvolfi, fjall á flugi, dýrkeypt djamm menntaskóladrengja og sorgleg saga af stúlku sem dó eftir að hafa tekið inn eiturlyf á djamminu fóru frétta hæst í vikunni sem var á Vísi. Alvarlegt slys sem íslensk stúlka í Noregi lenti í og saga stúlku sem ánetjaðist rítalíni ung að aldri vöktu einnig athygli. Þá má ekki gleyma smyglaranum sem heldur úti svartri verslun í fangelsi og ummælum um ónafngreindan mann sem voru dæmd dauð og ómerk.

Lést eftir margfaldan dauðaskammt af Mollý

Sjónvarpsþátturinn Brestir hóf göngu sína á Stöð 2 í byrjun vikunnar þar sem Þórhildur Þorkelsdóttir sagði sögu Evu Maríu Þorvarðardóttur sem fannst látin í eftirpartýi í vesturbæ Reykjavíkur þann 16. nóvember síðastliðinn. Banamein hennar var margfaldur dauðaskammtur af eiturlyfinu Mollý, eða MDMA, sem fjölmörg ungmenni telja skaðlaust og þykir lítið tiltökumál að taka inn á djamminu.

Veltu bíl í kjallaranum

Myndband úr öryggismyndavélakerfi Höfðatorgs var sett á YouTube í vikunni og sló rækilega í gegn. Á myndbandinu sést afar óheppið par keyra í gegnum öryggishlið í bílakjallara Höfðatorgsturnsins. Þau áttu afar erfitt með að komast út þrátt fyrir ítrekaðar tilraunir og var það ekki fyrr en þau bökkuðu af krafti á hliðið að þau komust í gegn. Það vildi þó ekki betur til en svo að þau veltu bílnum á hvolf í leiðinni. Eigendur Höfðatorgs létu fjarlægja myndbandið á föstudag eftir að það hafði verið í birtingu í tvo daga.

Fljúga yfir fjöll en flytja þau ekki

Kraftajötninum Hafþóri Júlíusi Björnssyni var svarað skemmtilega af starfsmanni Icelandair á Twitter. Hafþór birti mynd af sér inni á klósetti í flugvél Icelandair um helgina og talaði um hversu erfitt það sé að vera jafn stór og hann, þegar maður ferðast. Hafþóri fékk svar um hæl: „Sæll Hafþór, því miður eru flugvélarnar til þess að fljúga yfir fjöll, ekki flytja þau. Voanndi naust þú flugsins.

Dýrkeypt djamm Verzlinga

Sextán drengir hafa verið reknir úr Verzlunarskólanum eftir að hafa verið staðnir að drykkju í húsakynnum skólans, sem þykir alvarlegt brot á reglum skólans. Forsaga málsins er að hópur nemenda við Verzlunarskólann voru að fara til Ítalíu í námsferð sem tengdist listfræðinámi nemendanna. Samkvæmt heimildum Vísis voru nemendurnir hátt uppi og hressir vegna fyrirhugaðrar ferðar; skemmtu sér vel í kjallara skólans áður en farið var út á Leifsstöð.

Alvarlega slösuð eftir mótorkrossslys

Brynja Hlíf Hjaltadóttir, 16 ára íslensk stúlka, lenti í alvarlegu mótorkrossslysi í Noregi fyrir tæpum hálfum mánuði. Brynja er nemandi í íþróttaskóla í Setesdal sem er um 200 km suður af Ósló. „Við vitum í raun og veru ekki ennþá hvað gerðist. Staðan er það alvarleg að við höfum ekki viljað spyrja hana út í hvað gerðist nákvæmlega,“ segir Hjalti Úrsus Árnasyni, faðir Brynju, sem er staddur úti í Noregi. Þrír hryggjarliðir brotnuðu og segir Hjalti að Brynja sé tilfinningalaus í fótunum eins og er.

Með geðhvarfasýki eftir rítalínsneyslu

Sunneva Ýr Sævarsdóttir var brosmild og skemmtileg stelpa sem átti stundum erfitt með að hemja skapið þegar henni mislíkaði eitthvað. Þrettán ára gömul var hún greind með mikla ofvirkni og byrjaði að taka inn Rítalín og leiddist eftir það inn á braut fíkniefna. Sextán ára gömul var Sunneva svo loks greind með geðhvarfasýki en var á þeim tíma of langt leidd í vímuefnaneyslu til þess að taka inn geðlyfin sem gátu hjálpað henni í átt að bata. Ísland í dag ræðir í kvöld við Herborgu, móður Sunnevu,sem lýsir erfiðum árum í lífi fjölskyldunnar en í dag er Sunneva búin að vera edrú í nokkra mánuði, tekur að staðaldri inn lyfin sín og er því í góðu jafnvægi.

Smyglari rekur svarta verslun á Kvíabryggju

Samkvæmt heimildum Fréttablaðsins starfrækir Sævar Sverrisson, sem afplánar dóm á Kvíabryggju vegna sterasmygls í Straumsvíkurmálinu svokallaða, sjoppu í herbergi sínu í fangelsinu. Þar er hægt að kaupa sígarettur, sælgæti og gos. Á stundum eru sígaretturnar sem Sverrir selur ekki með íslenskum tóbaksvarnamiða. Páll Winkel fangelsismálastjóri segist ekki hafa vitneskju um verslunina á Kvíabryggju en sé það svo að fangi sé að selja smygl í fangelsinu verði það kært til lögreglu. 

Ummæli um ónafngreindan mann ómerk

Héraðsdómur Reykjaness dæmdi þann 13. október nokkur ummæli í bókinni Valsað milli vídda dauð og ómerk. Dómurinn dæmdi einnig höfund bókarinnar, Þórunni K. Emilsdóttur, til að greiða manni 200 þúsund krónur í miskabætur vegna ummælanna. Í dómsorði segir frá því að maðurinn haldi því fram að við útgáfu bókarinnar hafi hún hringt í fjölda fólks og upplýst að gerandinn í bókinni væri stefnandi. Það sé raunar viðurkennt í bókinni.