Áfrýjun Egils vegna nauðgunarummæla á dagskrá Hæstaréttar

Kolbeinn Tumi Daðason skrifar 13. október 2014 12:30

Egill Einarsson krefst þess að ummæli Inga Kristjáns Sigumarssonar verði dæmd dauð og ómerkt. Vísir/Vilhelm

Mál Egils Einarssonar, einnig þekktur sem „Gillzenegger“, gegn Inga Kristjáni Sigurmarssyni verður tekið fyrir í Hæstarétti eftir tvær vikur. Egill fór fram á að ummæli sem Ingi Kristján skrifaði við mynd sem hann birti á Instagram yrðu dæmd ómerkt. Þá fór hann fram á hálfa milljón króna í bætur. Héraðsdómur Reykjavíkur sýknaði Inga Kristján í nóvember. Egill áfrýjaði málinu til Hæstaréttar.

Ummælin sem Egill krefst að verði dæmd dauð og ómerkt voru skrifuð á forsíðumynd Monitor og birt á Instagram.

Ingi Kristján skrifaði ummælin „Farðu til fjandans nauðgarasvín“ við myndina sem hann birti á Instagram. Myndina má sjá hér til hliðar. Egill kærði einnig Sunnu Ben Guðrúnardóttur fyrir ummæli á Facebook en hún kallaði Egil meðal annars nauðgara. Ólíkt ummælum Inga Kristjáns voru ummæli Sunnu Ben dæmd dauð og ómerkt. Egill krafðist einnar milljón krónu miskabætur en dómurinn féllst ekki á þá kröfu.

Tilefni ummæla þeirra Inga Kristjáns og Sunnu Ben var nauðgunarákæra á hendur Agli í desember 2011. Ríkissaksóknari ákvað í júní 2012 að ekki væri ástæða til að sækja málið. Egill neitaði alltaf sök. Fór Egill í kjölfarið í viðtal hjá Monitor sem fór fyrir brjóstið á Inga Kristjáni og Sunnu. Skrifaði Ingi Kristján ofangreind ummæli á forsíðumyndina í Monitor.

Málið verður tekið fyrir í Hæstarétti þann 28. október. Hæstiréttur hefur í kjölfarið þrjár vikur að hámarki til að fella dóm sinn.

Tengdar fréttir

Fór hágrátandi heim frá Gillzenegger

Stelpan sem kærði Egil Einarsson fyrir nauðgun í haust fór hágrátandi af heimili Egils nóttina sem hún fullyrðir að hann hafi nauðgað sér. Þetta kemur fram í yfirlýsingu sem réttargæslumaður stúlkunnar hefur sent fjölmiðlum.

29. júní 2012 11:25

Ingi Kristján: „Mjög sáttur með dóminn“

„Ég er fyrst og fremst ánægður að þetta mál sé nú lokins frá. Þetta hefur tekið langan tíma og gott að þessu sé lokið,“ segir Ingi Kristján Sigurmarsson.

1. nóvember 2013 14:45

Menn ekki jafnir fyrir dómi

Egill Einarsson hefur fengið sitthvora niðurstöðuna í tveimur sambærilegum málum. Jón Steinar Gunnlaugsson segir dómara hafa gleymt meginmarkmiði réttarríkisins og láti áhugamál sín og hugðarefni hafa áhrif á dómsniðurstöðu.

6. nóvember 2013 13:16

„Egill skapaði sjálfur skrípið“

Verjandi í meiðyrðamáli segir að Egill Einarsson sé hafi sjálfur skapað þá orðræðu sem hann stefnir nú fyrir. Engu skiptir hvort að það hafi verið í hans eigin nafni eða einhvers "skrípis“ eins og verjandinn komst að orði.

26. september 2013 13:54

Egill búinn að kæra stúlkuna

Egill "Gillzenegger“ Einarsson, hefur kært stúlkuna sem sakaði hann um nauðgun til lögreglu. Hann óskar eftir lögreglurannsókn á tildrögum þess að hann, ásamt unnustu sinni var borinn sökum, um svívirðilegan glæp, sem hafi verið rangar. "Ég hef einsett mér að komast til botns í þessu máli," segir Egill í yfirlýsingu sem hann sendi fjölmiðlum.

3. júlí 2012 13:28

"Sýndi netumræðunni skilning"

Egill Einarsson, betur þekktur sem Gillzenegger, sagði í héraðsdómi í morgun að enginn hafi skráð sig í fjarþjálfun hjá sér í 10 daga eftir viðtalið við Guðnýju Rós Vilhjálmsdóttur birtist í Nýju lífi í lok ágúst.

26. september 2013 11:32

Gillzenegger: Ömurlegt að vera ranglega sakaður um svívirðilegan glæp

Egill "Gillzenegger“ Einarsson segir að þó hann sé ánægður með að nú liggi fyrir ákvörðun þess efnis að lögreglan muni rannsaka sérstaklega rangar sakagiftir á hendur sér og unnusti sinni, megi ekki gleyma því að það sé ömurlegt hlutskipti að vera ranglega sakaður um svívirðilegan glæp.

13. nóvember 2012 20:33