Gillz stefnir syni þingmanns fyrir meiðyrði - og þremur öðrum

Egill Einarsson, eða Gillzenegger, eins og hann er oft kallaður, hefur falið lögmanninum Vilhjálmi H. Vilhjálmssyni að stefna fjórum einstaklingum fyrir meiðyrði.

Vilhjálmur staðfestir í samtali við Vísi að hann hafi sent fjórum einstaklingum kröfubréf um að þeir gætu dregið ummæli sín til baka, viðurkennt að þau væru ekki rétt og svo borga Agli hálfa milljón króna, sem hann hyggst láta renna til góðgerðarmála.

Þrenn ummæli féllu á vefsíðu þar sem forsíðu fylgirits Morgunblaðsins, Monitor, var mótmælt. En Egill prýddi forsíðuna. Þar áttu sér stað miklar samræður á milli notenda samskiptavefsins Facebook. Vilhjálmur segir að þar hafi verið að finna refsiverð ummæli.

Fjórða málið varðar Inga Kristján Sigurmarsson, en mynd sem hann deildi á netinu - og gekk manna á milli - vakti gríðarlega athygli. Á hana var búið að skrifa ásökun á hendur Agli sem lögmaður hans telur refsiverða. Egill sagði reyndar í viðtali við Vísi um málið á sínum tíma, að það "væri augljóslega ekki allt í lagi" hjá þessum dreng. Þess má geta að Ingi Kristján er sonur Álfheiðar Ingadóttur og Sigurmars K. Albertssonar, lögmanns.

Einstaklingarnir fjórir fengu allir frest til þess að verða við beiðnum Egils í síðustu viku, en enginn þeirra gerði það með fullnægjandi hætti að sögn Vilhjálms. Því mega þau öll búast við því að verða stefnt.

Þegar Vilhjálmur er inntur út í viðbrögð Egils svarar hann. "Það er orðið hreint með ólíkindum hvað fólk leyfir sér að segja á netinu og halda rakalaust fram. Það er búið að sýna umræðunni ótrúlega þolinmæði. En þegar er verið að ásaka menn síendurtekið um alvarlegan glæp þá þarf að bregðast við því."