"Sýndi netumræðunni skilning"

Egill Einarsson, betur þekktur sem Gillzenegger, sagði í héraðsdómi í morgun að enginn hafi skráð sig í fjarþjálfun hjá sér í 10 daga eftir viðtalið við Guðnýju Rós Vilhjálmsdóttur birtist í Nýju lífi í lok ágúst.

Aðalmeðferð í meiðyrðamáli hans gegn Sunnu Ben Guðrúnardóttur fer nú fram í Héraðsdómi Reykjavíkur. Egill kærði Sunnu Ben fyrir að saka sig í færslu á netinu, að hafa nauðgað stúlku.

Egill gaf þar skýrslu í morgun og var meðal annars spurður út í viðtal sem hann gaf tímaritinu Monitor í nóvember í fyrra.

„Aðdragandi þess að ég gaf þetta viðtal var að ég er kærður fyrir nauðgun sem ég er saklaus af. Svo tók við netumræða og ég sýndi því skilning. Það hvarflaði ekki að mér að kæra neinn fyrir meiðyrði meðan málið var í gangi en umræðan varð verri og verri. Svo er ég kallaður nauðgari eftir að málinu var vísað frá,“ sagði Egill.

„Ég sá umræðu tengda viðtalinu. Það fer yfir strikið þegar ég er kallaður nauðgari. Því fylgir örvænting, eins og ég geti aldrei fengið ævina aftur. Það má kalla mig öllum illum nöfnum og móðga mig, en um leið og þú sakar mig um refsivert athæfi, þá ferðu yfir línuna,“ sagði hann.

„Það voru nokkur ummæli sem fóru yfir strikið, og ég kærði nokkra fyrir meiðyrði. Það var þó einn sem baðst innilega afsökunar, ég tók það til greina og lauk málinu,“ sagði hann.

Hann var spurður út í hvernig viðskiptin hjá sér hafi verið þegar þessi umræða koma upp, en Egill rekur fjarþjálfun.

„Þau hrynja um leið og þessi umræða kemur upp. Það gerðist í þessu tilfelli. Það skráði sig ekki einn einasti maður í 10 daga eftir að umfjöllunin birtist í Nýju lífi. Umræðan var orðin það slæm,“ sagði hann.

Þá var hann spurður út í mörkin á milli Egils Einarssonar, og Gillz.

„Gillz er fyrir löngu orðið að listamannsnafni. Þetta byrjaði sem hlutverk en er nú orðið að listamannsnafni. Ég er kallaður Gillz, vinir mínir kalla mig Gillz. Það er hins vegar á hreinu að Egill Einarssonar hefur aldrei nauðgað, Gillz hefur aldrei nauðgað. Skjólstæðingur þinn getur hvorki kallað Egil eða Gillz nauðgara,“ sagði Egill við verjanda Sunnu Ben.