Arnþór Ari á leið frá Fram

Arnþór Ari Atlason hefur nýtt sér uppsagnarákvæði í samningi sínum við Fram samkvæmt heimildum liðsins og er því á leið frá félaginu.

Arnþór Ari er 21 árs gamall og kom til Fram frá Þrótti fyrir tímabilið. Hann skoraði þrjú mörk í alls 20 leikjum með Fram sem féll úr Pepsi-deildinni í sumar.

Meðal þeirra liða sem hafa áhuga á kappanum eru FH, Stjarnan, Breiðablik, Fylkir, Víkingur og Valur. Það er því ljóst að það er hörð samkeppni fram undan um þennan öfluga miðjumann.