Magnús hættur hjá Val

Magnús Gylfason er hættur sem þjálfari Vals. Þetta kemur fram í tilkynningu á heimasíðu félagsins í kvöld.

Í tilkynningunni segir:

Knattspyrnufélagið Valur og Magnús Gylfason hafa komist að samkomulagi um að Magnús láti af stöfum sem aðalþjálfari meistaraflokks karla í knattspyrnu.

Magnús og Valur hafa átt afar farsælt samstarf undanfarin tvö ár og er ákvörðunin fyrst og fremst Magnúsar þar sem hann hyggst taka sér frí frá þjálfun. Valur þakkar Magnúsi kærlega fyrir vel unnin störf í þágu félagsins og vonar félagið að samstarf verði á öðrum sviðum fótboltans sem allra fyrst. Valur mun nú hefja leit að nýjum þjálfara í stað Magnúsar og skýrast þau mál á næstu vikum.

Magnús tók við Val eftir tímabilið 2012 og undir hans stjórn lenti liðið í 5. sæti í ár, líkt og í fyrra.

Ólafur Jóhannesson, fyrrverandi þjálfari FH og landsliðsþjálfari, hefur verið orðaður við þjálfarastöðuna á Hlíðarenda, en hann vildi ekkert gefa upp um framtíðaráform sín í samtali við Vísi í dag.